लिभर खराब जूगुया छुं लक्षण व घरेलु उपचार

लिभर (स्येँ) झीगु म्हया छगू मुख्य अंग खः। लिभरय् छुं नं कथंया खराबी वल धाःसा थुइकादिसँ कि खतरा वयेत्यंगु दु । छाय्कि छुं नं ल्वय् जुइत्यन धाःसा झीगु म्हं उकिया संकेत न्हापा हे बी । अले उगु संकेत थुइके मफुत धाःसा झी समस्याय् बांमलाक हे तक्यनी ।
लिभर खराब जुइगु कारण तःगू हे दु ।

उकी मध्ये मुख्यगु कारण यक्व पुकातःगु, सियातःगु नसाज्वलं अथवा बजराय् तयारि न्यायेदुगु मसला कडा जुइक तयातःगु नसाज्वलं नयेगु अथवा अय्लाः यक्व त्वनेगु खः । अप्वः थें मनूतय् थ्व धारणा दयाच्वनी कि उपिं थज्याःगु चीजं तापाक हे च्वनाः, सामान्य नसाज्वलं हे नयेगु यानाच्वनागु खः । उमिसं नं थन ध्यान बीमाःगु दु कि लिभर खराब जूगुया लक्षण छु छु खः ?

सावधान जुइगुलिइ हे समझदारी दु । उकिं छितः क्वय् बियाकथंया छुं छुं लक्षण मध्ये छुं नं खनेदत धाःसा तुरुन्त कि त डाक्टर क्यं झासँ, कि मखुसा नयेत्वनेगु बानिइ सुधार हयादिसँ ।

लिभर खराब जूगुया छुं छुं लक्षण
१) लिभरं बांलाक ज्या यानामच्वन धाःसा छिगु म्हुतु नवयावइ । थथे थ्व कारणं जुइ, छाय्कि म्हुतुइ अमोनिया अप्वः पिहां वइ ।
२) लिभर खराब जूगु मेगु छगू संकेत स्किन (छ्यंगू) क्षतिग्रस्त जुइगु खः । मिखाया क्वसं च्वंगु स्किन तसकं क्यातुइ, गुकी छिगु स्वास्थ्यया असर यचुक हे सीदइ ।
३) पाचनतन्त्र स्यनी । छिगु लिभरय् दाः खात अथवा लिभर तःधं जुल धाःसा छितः लः तकं पचे याये थाकुइ ।
४) छ्यंगुलिइ तुयुगु चातः वइ । यदि छिगु छ्यंगूया रंग वन अले उकी तुयुगु चातः खनेदत धाःसा उकियात ‘लिभर स्पट’ धकाः धायेगु याइ ।
५) छिगु च्व अथवा खि न्हिं न्हिं गाढा रंगयागु वयेगु सुरु जुल धाःसा लिभर खराब जूगु जुइफु । यदि थथे छक्वः हे जक जुल धाःसा व लः त्वने मगानाः जूगु खयेफु ।
६) यदि छिगु मिखाय् तुयुगु ब्व म्हासुयावल अले लुसि नं म्हासुयावल धाःसा छितः म्हासुल्वय् (जण्डिस) जूगु जुइफु । थुकिया मतलब छिगु लिभरय् इन्फेक्सन जूगु खः ।
७) लिभरं छताजि इन्जाइम पिकाइ, गुकिया नां खः – ‘बाइल’, गुगु तसकं मसाःगु जुइ । यदि छिगु म्हुतुं तसकं खाइसे च्वन धाःसा थुकिया मतलब खः कि छिगु म्हुतुइ तक बाइल थ्यंकः वयाच्वंगु दु ।
८) लिभर तःधं जुलकि प्वाथय् मनावइ, गुकियात झीसं अक्सर ल्ह्वंगु धकाः तायेकाच्वनी ।
९) झीगु पाचनतन्त्रय् लिभरया महत्वपूर्ण योगदान दु, थीथी अंगया ज्या गुकी नसाया मेटाबोलिज्म, ऊर्जा मुंकेगु, थीथी विषाक्त पदार्थयात पितछ्वयेगु डिटोक्सिफेकिशेन, प्रतिरक्षा प्रणालीया समर्थन व थीथी रसायनया उत्पादन नं दुथ्याः । तर गुलिखे चीज गथेकि भाइरस, वंशानुगत ल्वय्, थीथी कथंया वासः व अय्लाखं लिभरयात स्यंकाहइ । तर थन बियागु थीथी उपाय नालाः छिं थःगु लिभरयात बल्लाकाः व ल्वय्पाखें तापाकाः तयातयेफइ ।

लिभरया खराबी लंकेगु छुं छुं घरेलु उपाय
१) हलू लिभरया स्वास्थ्यय् सुधार यायेत तसकं ज्या वः । थुकी एन्टिसेप्टिक गुण दइ, अले एन्टिअक्सिडेन्टया रुपय् ज्या याइ । हलूया रोग निरोधक क्षमतां हेपाटाइटिस बी व सी या कारणं दयावइगु भाइरस अप्वः दयावये मफयेक पनातइ । अथे जुयाः हलूयात थःपिनिगु नसाज्वलनय् दुथ्याकादिसँ अथवा बहनी द्यने न्ह्यः दुरुइ हलू छप्तिचा तयाः त्वनादिसँ ।
२) अम्बः भिटामिन सीया दकलय् सम्पन्न स्रोत मध्ये छगू खः । थुकिया सेवनं लिभरया कार्यशीलता दयेकेत ग्वाहालि यानाच्वनी । अध्ययनं सीदये धुंकूगु दु कि अम्बलय् लिभरयात सुरक्षित यानातइगु दक्वं तत्व दु । लिभरयात स्वस्थ यानातयेत छिं न्हिं प्यंगः न्यागः अम्बः कचिकं नयेगु यायेमाः ।
३) मेवा लिभरया थीथी ल्वय्या निंतिं दकलय् सुरक्षित प्राकृतिक उपचार मध्ये छगू खः । विशेष रुपं लिभर सिरोसिसया निंतिं न्हिं न्हिं निगू चम्चा मेवाया रसय् बागू चम्चा कागतिया रस ल्वाकछ्यानाः त्वनादिसँ । थ्व ल्वय् पूवंक लंकेत थुगु मिश्रणया सेवन स्ववाःनिसें प्यवाः तक यानादिसँ ।
४) पलः व गाजरया रसया मिश्रण नं लिभर सिरोसिसया निंतिं यक्व हे फाइदाजनक घरेलु उपाय खः । गाजरया रस व पलःया रस उतिउति ग्यंक ल्वाकछ्यानाः त्वनादिसँ । लिभरया मरम्मतया निंतिं थुगु प्राकृतिक रसयात छुं मखुसां न्हिछिया छक्वः ला त्वना हे दिसँ ।
५) स्याउ व वाउँगु हः दुगु तरकारिइ दुगु पेक्टिनं पाचनतन्त्रय् दयाच्वंगु थीथी विषाक्त पदार्थयात पितछ्वयाः लिभरया रक्षा याइ । थ्व बाहेक वाउँचा तरकारि पित्तया प्रवाहयात तच्वयेकी ।
६) एभोकाडो व ख्वःसिं थःपिनिगु आहारय् दुथ्याकाः नं छिं लिभरयात थीथी ल्वय्या आक्रमणपाखें पनातयेफइ । एभोकाडो व ख्वःसिनय् दइगु ग्लुटथाय्नं लिभरय् मुनाच्वंगु थीथी विषाक्त पदार्थयात पितछ्वयाः थुकियात सफा यानाबी ।

सम्बन्धित बुखँ

LEAVE YOUR COMMENTS