नीलबाराही गुथिया एसइइ सम्मान
येँ(नेपालभाषा टाइम्स)÷ थनया क्वहितिइ च्वंगु नीलबाराही गुथिपाखें २०८० सालया एसइइ परीक्षाय् ताःलाःपिंत छगू ज्याझ्वःया दथुइ हनेज्या याःगु दु । गुथि अन्तर्गतया नीलबाराही शिक्षा विकास कोषं वंगु शनिवाः एसइइ उत्तीर्ण जूपिंत हनेज्या याःगु खः । कोषं एसइइ उत्तीर्ण गुथिया दुजःया काय म्ह्याय्पिंत हनापौलिसें मतिनाया चिं देछासे हनेज्या याःगु खः । कोषं थुगुसी एसइइ उत्तीर्ण खुम्ह विद्यार्थीपिंत हनेज्या याःगु खः ।
मूपाहांकथं झायादीम्ह नांजाःम्ह अभियन्ता सुमन साय्मिं विद्यार्थीपिंत हनेज्या यानादीगु खः । ज्याझ्वलय् गुथिया महत्व व आवश्यकताया बारे नुगःखँ तयादीगु खः । वय्कलं न्हापा न्हापा झी पुर्खापिंसं समाजयात न्ह्यःने यंकेत गुथि नीस्वनातःगु खःसां थौं वयाः अज्याःगु गुथि राज्यसत्ता व सरकारया निशानाय् लानाच्वंगु दु धयादिल ।
नेवाःतय्त वयाच्वंगु थीथीकथंया उत्पीडन व नेवाः मुद्दायात सशक्त रुपं न्ह्यःने यंकेत थौंया न्हू पुस्तां राजनीतिइ नं ध्यान बीमाःगु खँय् बः बियादिसें गुथि, परम्परा, संस्कार, संस्कृति, सभ्यता, सम्पदा ल्यंका तये फत धाःसा जक झीगु म्हसीकायात नं ल्यंका तये फइ धयादिल ।
LEAVE YOUR COMMENTS