श्रम सम्बन्धी समस्याबारे मन्त्रालयं कल सेन्टर स्थापना याइगु

येँ – श्रम सम्बन्धी समस्याया बारेय् गुनासो व जिज्ञासा अःपूक कायेत व तत्काल संबोधन यायेत श्रम मन्त्रालयं कल सेन्टर थापना याःगु दु । श्रम, रोजगार तथा सामाजिक सुरक्षामन्त्री गोकर्ण विष्टं सोमवाः छगू ज्याझ्वःया दथुइ कल सेन्टरया उलेज्या यानादीगु दु । गुनासो प्वंकेत व जानकारी काये चाहे जूपिं सेवाग्राहीं स्वदेशं जूसा कल सेन्टरया सम्पर्क नम्बर ११४१ वा १६६००११५०००५ सं व विदेशं जूसा इमेल, फेसबुक, म्यासेन्जर, इमो, भाइवर थेंज्याःगु अनलाइन नेटवर्क पाखें निःशुल्क रुपय् कल सेन्टरया सम्पर्क नम्बर ९७७१५९७०००८ सं सम्पर्क तयेफइगु व्यवस्था याःगु दु ।

कल सेन्टरय् सुथय् ७ बजे निसें बहनि ९ बजे तक फोन यायेफइगु खँ धाःगु दु । सेवाग्राहीया ल्याः व मागयात ध्यानय् तयाः भविष्यय् उगु सेवायात नीप्यघौं सञ्चालन यायेगु कथं ज्या जुयाच्वंगु मन्त्री विष्टं कनादीगु दु । कल सेन्टरय् वैदेशिक रोजगारीया झ्वलय् ठगीइ लाःपिं वा स्वास्थ्य समस्यां पीडित जुयाः छेँय् लिहां वयेन्ह्याःपिं, मखुगु मुद्दाय् जेल सजाय फयाच्वंपिंत निःशुल्क कानुनी सहायताया आवश्यकता दुपिंसं थःपिनिगु समस्या प्वंकेफइगु खँ धाःगु दु ।

अथे हे कल सेन्टरपाखें वैदेशिक रोजगारी सम्बन्धी अभिमुखीकरण, सीप विकास तालिम व सुरक्षित वैदेशिक रोजगारीया निंतिं नालेमाःगु सावधानीया बारे जानकारी कायेफइगु खँ धाःगु दु । उकथं हे योगदानय् आधारित सामाजिक सुरक्षा ज्याझ्वलय् ब्वति कायेगु प्रक्रिया, थुगु सम्बन्धय् फयेमालिगु समस्याया बारे नं जानकारी कायेफइ ।

सम्बन्धित बुखँ

LEAVE YOUR COMMENTS