पुनःनिर्माण भुखाय् प्रतिरोधी जुइमाः

येँ – भुखाचं क्षतिग्रस्त जूगु संरचनात पुनःनिर्माण यायेबलय् भुखाय् प्रतिरोधी, अझ बांलाक व सशक्त जुइमाःगु खँय् सरोकारवालातय्सं बः बिउगु दु ।
गृह मन्त्रालय, स्थानीय विकास मन्त्रालय, सहरी विकास मन्त्रालय, संघीय मामिला तथा खानी तथा भूगर्भ विभाग लिसें जापान अन्तर्राष्ट्रिय सहयोग नियोग (जाइका), काठमाडौं उपत्यका भूकम्प विपद् जोखिम मूल्यांकन परियोजनां मंकाः कथं ग्वसाः ग्वःगु छगू ज्याझ्वलय् सरोकारवालातय्सं भुखाय् लिपाया पुनःनिर्माणयात कयाः उकथं बः बिउगु खः ।

ज्याझ्वलय् विज्ञतय्सं हिमालय श्रृंखलाया जःखः च्वंगु नेपाःया आपालं भूभाग भुखाय्या जोखिमय् लानाच्वंगु व प्रकोपजन्य जूगु धासें पुनःनिर्माण यायेबलय् हाकनं भुखाय् ब्वयेफुगु खँयात नापं थीथी पक्षय् ध्यान बीमाःगु आवश्यक दुगु खँ धाःगु खः । उगु इलय् राष्ट्रिय भूकम्पमापन केन्द्रया प्रमुख लोकविजय अधिकारीं देय्या सुदूरपश्चिम लागाय् ५०० दँ न्ह्यवंनिसें भुखाय् मब्वःगुलिं शक्ति संचय जुयाच्वंगु धासें तःधंगु कम्पनया सम्भावना दुगु अध्ययनं क्यंगु दु धयादिल ।

२०७२ साल बैशाखय् ब्वःगु तःभुखाय् लिपांनिसेंया अध्ययनया सक्षिप्त प्रस्तुति बियादिसें सहरी विकास मन्त्रालयया सूचना अधिकारी सुमन सालिकें यल महानगरपालिका, ख्वप नगरपालिका व भुइजःसि नगरपालिकाया छगू लाखखा छेँया सुचं कयाः अध्ययन यानागु जानकारी बियादिल ।
ज्याझ्वलय् जाइकाया प्रतिनिधि नापं अध्ययन समूहया प्रमुख रियोजी ताकाहासी, परियोजना प्रमुख सहसचिव द्वारिका श्रेष्ठ, नेपाःस्थित जाइकाया प्रमुख जुन साकुमा लगायतं नेपाः अझं भुखाय्या जोखिमय् दुगु धासें भवन संहिताय् समसामयिक संशोधन यानाः पूर्णरुपं कार्यान्वनयय् हयेमाःगु खँय् बः बियादीगु खः ।