बीपिसीया २० प्रतिशत लाभांस पारित

येँ – बुटवल पावर कम्पनीं २० प्रतिशत नगद लाभांस बीगु जूगु दु । मंगलवाः च्वःगु २५ औं साधारण सभां कम्पनीया चुक्तापुँजीया २० प्रतिशत नगद लाभांस बीगु प्रस्ताव पारित याःगु खः ।अथेहे आः कम्पनीं सर्वसाधारणपाखें निम्ह संलचाक नं च्वने दइगु जूगु दु । कम्पनीं एफपिओ पिकाःगुलिं सर्वसाधारणपाखें नं संचालक च्वने फइकथं नियमावलीइ संशोधन याःगु खः ।

थौंकन्हय् बुटवल पावर कम्पनीं स्वंगू चिनियाँ कम्पनीलिसे जानाः १००० मेगावाट मत उत्पादनया निंतिं ज्या न्ह्याकाच्वंगु दु । चीनया स्वंगू प्रमुख जलविद्युत कम्पनी सिचुवान प्रोभिन्सियल इन्भेस्टमेन्ट गु्रप, चेङदु सिचेन इन्भेस्टमेन्ट गु्रप व छिमयुआन इन्जिनियरिङ कन्सेल्टिङ लिसे बुटवलं साझेदारी याःगु खः । थुमिगु साझेदारीइ दकलय् न्हापां गण्डकी अञ्चलय् लानाः तल्लो मस्र्याङ्दी जलविद्युत आयोजना दयेकेगु तयारी जुयाच्वंगु दु ।

थ्व आयोजना १०० मेगावाटया जुइ । लिसें थ्व हे साझेदारीइ च्वनाः १००० मेगावाटया मेगु आयोजना नं दयेकेगु खँ कम्पनीं धयातःगु दु । अथेहे इन्फ्रा एशिया लिसे जानाः ३७.६ मेगवाटाया कावेली एक जलविद्युत आयोजना व स्थानीय साझेदारलिसे जानाः ३० मेगावाटया न्यादी जलविद्युत आयोजना नं दयेकाच्वंगु दु ।