भोटेकोशी जःखःया सभ्यताया किपा ब्वज्या

यल – भोटेकोसी जःखः विकास जूगु सभ्यतायात प्रचार प्रसार यायेगु ताःतयाः कला प्रदर्शनी जूगु दु । पाटन संग्रहालयय् जेठ २६ गते निसें न्ह्याःगु थ्व कला प्रदर्शनी थौं तक न्ह्याइ । श्री जैमिन थैपी नारायण परोपकार केन्द्र व भोटेकोशी गाउँपालिकाया मंकाः ग्वसालय् जूगु थ्व प्रदर्शनी आइतवाः वाङमय शताब्दी पुरुष सत्यमोहन जोशीं उलेज्या यानादीगु खः ।

ज्याझ्वलय् न्ववानादिसें वय्कलं कलाकारतय्सं भोटेकोशीया सभ्यतायात चित्रय् न्ह्यथनबह जुइक न्ह्यब्वःगु खँ धयादिल । अथेहे जैमन थैपी नारायण मन्दिर गुथि व्यवस्थापन समितिया अध्यक्ष मेखबहादुर खड्कां सांस्कृतिक, पुरातात्विक, ऐतिहासिक रुपं सिन्धुपाल्चोक फुल्पिङकट्टीइ च्वंगु नारायण देगः व थुकिया जःखःया सम्पदा तसकं महत्वपूर्ण जूगु खँ कनादिल ।

जैमिन थैपी नारायण परोपकार केन्द्रया अध्यक्ष अनेश नेपालं प्रताप मल्लया पालय्या मूर्ति व सम्पदा फुल्पिङकट्टी क्षेत्रय् लूगुलिं थुकिया पुरातात्विक, सांस्कृतिक व ऐतिहासिक पक्षयात न्ह्यब्वयेगु ताःतयाः कार्यशाला व प्रदर्शनी यानागु खँ कनादिल । प्रदर्शनीय दुथ्याःम्ह कलाकार राकेशचन्द्र श्रेष्ठं चित्रय् भोटेकोशी सभ्यताया महत्वपूर्ण स्थल व सम्पदायात न्ह्यब्वयागु खँ कनादिल ।

प्रदर्शनीइ विकास बिसुंखे, विक्रम प्रजापति, चन्द्रा श्रेष्ठ, देवेन्द्र थुम्केली, राकेशचन्द्र श्रेष्ठ, दिपेन्द्रमान बनेपाली, दिबेश प्रधान, कान्छाकाजी भासिमा, लक्ष्मीप्रसाद खोटेजा, प्रकाश मानन्धर, राधेश्याम कर्माचार्य, राजेन्द्रप्रसाद याकामी, सुर्यराम सुवाल, अनत्त श्रेष्ठाचार्य च्वःगु कलाकृति ब्वयातःगु दु ।

फुल्पिङकट्टीइ च्वंगु नारायण देगःयात आधार दयेकाः वंगु वैशाख ९ निसें ११ गते तक चित्र कार्याशाला जूगु खः । उगु कार्याशालाय् तयार याःगु चित्र हे आः ब्वज्या जूगु खः । थनया मूर्तिकला नेपाल मण्डलय् दइगु मूर्तिया हुबहु प्रतिलिपि थें खनेदुगु खँ धाःगु दु ।

उबलय्या नेपाल मण्डलया कला संस्कृति गुकथं भोटेकोशी थ्यन धयागु न्ह्यसःया लिसः मालेज्या आःतक मजूनिगु खँ धासें ग्वसाः खलकं थुकिया बारे नं मालेज्या जुइमा धयागु ताःतयाः कार्यशाला व ब्वज्या याःगु खः । परोपकार केन्द्रया अध्यक्ष नेपालं येँ नं भोटेकोशीयात आःतक म्हसिइके मफुगुनिगु खँ धासें धयादीगु दु, ‘उबलय्या लोकंह्वाःम्ह जुजु प्रताप मल्लया पालय् बरु भोटेकोशी नां जाः जुइ ।

नारायण देगः फुल्पिङकट्टि व लिस्तिकोटय् लूगु प्रतापी जुजु प्रताप मल्लया अभिलेखं हे थ्व हे क्यं । थन देगः, चैत्य गुम्बा दु, गर्व यायेबहःगु इतिहास, संस्कृति दु । तर यक्वस्यां मसिउ । सुयां मिखाय् लाःगु खनेमदु ।

थुकि यानाः चायेकं मचायेकं हे थनया सम्पदा नाश जुइगु खतरा अप्वया वयाच्वंगु दु । आः नं संवेदनशील जुइमफुत धाःसा थनया जीवन्त इतिहास किंवदन्ती जूवनीगु निश्चित दु । उकिं भोटेकोशीया सभ्यतायात येँय् तक थ्यंकेगु जिमिगु कुतः खः ।’