नागरिकता पीडितपिनि प्रदर्शन
येँ (नेपालभाषा टाइम्स)÷राष्ट्रपतिं प्रमाणीकरण यायेधुंकूगु नागरिकता विधेयकयात सर्वोच्च अदालतं अन्तरिम आदेश जारी यानाः पना बिउगु खँय् विरोध यासें म्हिगः नागरिकता मदयाः पीडित जूपिंसं येँया फिब्व ख्यलय् वयाः प्रदर्शन यात ।
प्रदर्शनकारीतय्सं नागरिकता काये दइगु थःपिनि संवैधानिक अधिकारं बञ्चित याःगु धासें थःपिंत गय् यानाः नागरिकता दइगु खः सर्वोच्च अदालतं धया बी माल धकाः माग याःगु दु । उमिसं नागरिकता विधेयक प्रमाणीकरण मयासे पनातःम्ह पुलांम्ह राष्ट्रपति विद्या भण्डारीयात कारवाही यायेमाः धकाः च्वयातःगु ब्यानर नं ब्वया वःगु खः ।
प्रदर्शनकारीतय्सं थः मां व अबु निम्हं नेपाःया जन्मसिद्ध नागरिक जुलं नं थःपिंत नागरिकता मबिउ धासें नागरिकता मदयाः थःपिनि आखः ब्वनेगु व रोजगारी यायेगु अवसर समेत गुमे जुयाः भविष्य अन्धकार जूगु खँ नं धाःगु दु ।
नेपाली खयाः नं नेपाली नागरिक जुइगुपाखें बञ्चित जुइ मालाच्वंगु विडम्बनाया विषय खः धासें उमिसं सरकारं न्ह्यागु हे कानुन दयेकूसां गैर नेपाःमितय्सं धाःसा कर्मचारीयात घुस नकाः धमाधम नागरिकता कयाच्वंगु द्वपं नं बिउगु दु । वर्तमान सरकारं न्हापा रोके जुयाच्वंगु नागरिकता विधेयकयात खुले यानाः प्रमाणीकरण याःगु खःसां सर्वोच्च अदालतं आदेश बियाः हानं पना बिउगु खः ।
प्रतिलिपि माग
सर्वोच्च अदालतं नागरिकता सम्बन्धी विधेयक प्रमाणीकरण निर्णयया प्रतिलिपि झिके यायेत आदेश बिउगु दु । विधेयक प्रमाणीकरण यायेत मन्त्रि–परिषदं जेठ १२ गते याःगु सिफारिस व
राष्ट्रपति कार्यालयं जेठ १७ गते याःगु प्रमाणीकरणया निर्णय झिके यायेगु आदेश बिउगु खः । म्हिगः न्यायाधीशपिं प्रकाशमान सिंह रावत व पुष्पलता माथेमाया मंकाः इजलासं उगु आदेश बिउगु खः । राष्ट्रपति रामचन्द्र पौडेलं नागरिकता विधेयक प्रमाणीकरण यायेधुंकाः उकिया विरुद्ध अधिवक्ता सुरेन्द्र भण्डारीं सर्वोच्च अदालतय् रिट तःगु खःसा सर्वोच्च अदालतं अल्पकालीन अन्तरिम आदेश बिउगु खः ।
LEAVE YOUR COMMENTS