वरिष्ठ नेतातय् विरुद्ध उजुरी
येँ (नेपालभाषा टाइम्स)- चुनावया लागिं म्हीग उम्मेदवारी दर्ता याःपिं गुलिखे वरिष्ठ नेतातय् उम्मेदवारी खारेज यायेमाः धइगु उजुरी लाःगु दु । उकी प्रधानमन्त्री लिसें कांग्रेस सभापति शेरबहादुर देउवा तकं दुथ्याः ।
प्रधानमन्त्री देउवां उम्मेदवारी दर्ता याःगु फारामय् तयातःगु जन्म मिति व नागरिकताया जन्म मिति पाः धासें गन्यापधाराया कर्णबहादुर मल्लं निर्वाचन आयोगय् उजुरी दर्ता याःगु दु । देउवाया नागरिकताय् जन्म मिति वि.सं. २००३ दुसा उम्मेदवारी दर्ताया फारामय् २००२ लानाच्वंगु दु । निर्वाचन आयोगं थ्व उजुरी बारे छानबिन यानाः कन्हय् लिसः बी धाःगु दु ।
अथे हे ललितानिवास जग्गा प्रकरणय् नां वःम्ह धासें कांग्रेस उम्मेदवार विजय गच्छदारया उम्मेदवारी विरुद्ध नं उजुरी लाःगु दु । सुनसरी–३ पाखें उम्मेदवारी बियादीम्ह गच्छदार उगु जग्गा प्रकरणय् लानाः सांसद पदं समेत निलम्बित जूम्ह धासें येया विवेक अधिकारीं म्हिगः निर्वाचन आयोगय् उजुरी तःगु खः । विशेष अदालतं वय्कःयात १० लाख तका धरौती कयाः त्वःतूगु खः ।
अथे हे येँ क्षेत्र नं. १ या स्वम्ह प्रमुख उम्मेदवारपिं कांग्रेसया प्रकाशनमान सिंह, एमालेया किरण पौडेल व राप्रपाया रवीन्द्र मिश्र स्वम्हेस्यां उम्मेदवार खारेज यायेमाः धकाः अधिवक्ता बालकृष्ण न्यौपानें माग यानादीगु दु । न्यौपाने उगु हे क्षेत्रं नेपालका लागि नेपाली पार्टीया उम्मेदवार खः । थ्व स्वम्हं उम्मेदवारतय्सं निर्वाचन आयोगं तोके यानातःगु कानुनी प्रक्रिया पूरा मयासे मनोनयन दर्ता याःगु धासें वय्कःपिनि उम्मेदवारी खारेज यायेमाःगु माग वय्कलं यानादीगु खः । उगु हे क्षेत्रया प्रदेशपाखे (ख) या कांग्रेस उम्मेदवार सुरजचन्द्र लामिछाने व एमाले उम्मेदवार गणेशप्रसाद दुलाल विरुद्ध नं अज्याःगु हे उजरी लाःगु दु ।
उकथं हे येँ–४ य् कांग्रेस उम्मेदवार गगन थापा व एमाले उम्मेदवार डा. राजन भट्टराई विरुद्ध नं उजुरी लाःगु दु । वय्कःपिंसं निर्वाचन आयोगया फारामय् नां च्वयाः मनोनयन यायेमाःथाय् पार्टीया लेटरप्याडय् नां च्वयाः मनोनयन याःगु जूगुलिं थ्व प्रक्रिया मिले मजू धासें उजुरी लाःगु खः ।
मेखे कैलालीया थारू अभियन्ता रेशम चौधरीया उम्मेदवारी नं खारेज जुइ फइगु खँ धाःगु दु । वय्कः आः तक नं फौजदारी मुद्दाया कारणं जेलय् लानाच्वंगु वय्कःया उम्मेदवारी खारेज जुइ फइगु खँ धाःगु दु । न्हापा वय्कलं भूमिगत जुयाः हे मेगु पार्टीपाखें चुनाव त्याकादीगु खःसा थुगुसी थःगु हे पार्टीपाखें उम्मेदवारी बियादीगु खः ।
LEAVE YOUR COMMENTS