छन्हुया दुने न्यापु ज्वःम्येँ रेकर्ड

येँ – नेपालभाषा सांगीतिक ख्यलय् छन्हुया दुने न्यापु ज्वःम्येँ रेकर्ड जूगु दु । वंगु छुं दिं न्ह्यः जक छम्ह हे च्वमि, लय्चिनामि व म्येँ हालामिनापं छम्ह हे रेकर्डिष्ट व म्युजिक एरेन्जय् उकथं ज्वःम्येँ रेकर्ड जूगु खः ।म्येँ च्वमि अमृतरत्न शाक्यया च्वसाय्, सुरेनमान शाक्यया लसय् श्याम महर्जनया संगीत संयोजनय् सुरेनमान शाक्य, प्रतिमा वज्राचार्य व मय्जु सुमन मानन्धरया सलय् न्यापु नेवाः ज्वःम्येँ रेकर्ड जूगु खः ।

अस्टेलियाय् च्वनाच्वंम्ह म्येँ हालामि व संगीतकार शाक्य नेपाः वःगु इलय् लाकाः उगु म्येँ रेकर्ड याःगु खः । रेकर्ड जूगु न्यापु म्येँमध्ये निपु म्येँया म्युजिक भिडियोया निर्माण यानाः युट्युबपाखें सार्वजनिक नं यायेधुंकूगु दु ।

थनिं निदँ न्ह्यः नेपाः वःगु इलय् नं संगीतकःमि शाक्यं न्यापु म्येँ ज्वना वःगु खःसा उगु इलय् वय्कलं छपु म्येँ नांजाःम्ह म्येँ हालामि रत्नशोभा महर्जनलिसे रेकर्ड यानादीगु खः । रेकर्ड जूगु म्येँया संगीत संयोजन बालकृष्ण वंशी व श्याम महर्जनं यानादीगु खः ।