४८ गू मेनपावर कम्पनीया कारोवार रोक्का

येँ – श्रम तथा रोजगार मन्त्रालय अन्तर्गतया वैदेशिक रोजगार विभागं ४८ गू मेनपावर कम्पनीया अनलाइन कारोबार बन्द यानाबिउगु दु । थुपिं कम्पनीतय्सं इलय् हे थःपिनि विवरण बुझे मयाःगुलिं रोक्का याःगु खँ धाःगु दु । विभागं फुक्कं मेनपावर कम्पनीयात वैशाख २३ निसें २९ गते तकया दुने थःपिनि सम्पूर्ण विवरण वैदेशिक रोजगार सूचना व्यवस्थापन प्रणालीइ अद्यावधि यायेत निर्देशन बिउगु खः ।

थुकीयात म्याद थप यानाः जेठ ३ गते तक याःगु खःसां उगु इलय् नं विवरण अद्यावधि मयाःगुलिं ४८ गू कम्पनीतय्सं अनलाइन कारोबार रोक्का यानाबिउगु खः ।

अनलाइन कारोबार बन्द यानाबिइवं आः थुपिं कम्पनीतय्सं वैदेशिक रोजगारलिसे सम्बन्धित छुं नं ज्या याये मखनीगु जूगु दु । विभागय् थौंकन्हय् १ हजार ५२७ गू मेनपावर कम्पनी दर्ता जुयाच्वंगु दु । थुपिं मध्ये १ हजार २७२ गू कम्पनी जक संचालनय् वयाच्वंगु व २०७ गू कम्पनीयात नियमविपरीत ज्या याःगु धासें खारेज यानाबीधुंकूगु खँ विभागं धाःगु दु ।