देय्न्यंकं स्वांयाः पुन्हि तःजिक न्यायेकल

येँ – २५६३ क्वःगु स्वांयाः पुन्हि (बुद्धजयन्ती) म्हिगः देय्न्यंकं तःजिक न्यायेकल । स्वायां पुन्हिया लसताय् म्हिगः थनया स्वयम्भूइ आनन्दकुटी विहारया ग्वसालय् जूगु मूल समारोह समितिइ मूपाहां कथं प्रधानमन्त्री केपी शर्मा ओलीं ब्वति कयादीगु खः । स्वयम्भूइ म्हिगः सुथंनिसें हे बौद्धमार्गीतय् तःधंगु भीड जूगु खःसा अन म्हिगः भगवान बुद्धया अस्थिधातु नं प्रदर्शन याःगु खः ।

आनन्दकुटीया ज्याझ्वः न्ह्यः बुद्ध जन्मभूमि लुम्बिनीइ जूगु ज्याझ्वलय् राष्ट्रपति विद्या भण्डारी लिसें प्रधानमन्त्री केपी शर्मा ओलीं ब्वति कयादीगु खः । उगु हे लसताय् अन लुम्बिनी भ्रमण वर्षया नं घोषणा जुल ।

स्वांयाः पुन्हिया लसताय् म्हिगः स्वनिगःया थीथी विहारय् सुथंनिसें ज्ञानमाला भजन हालेगु लिसें बुद्ध पुजा, धर्मदेशना जूगु खः । त्वाःत्वालय् खीर दयेकाः वितरण यायेगु ज्या नं जूगु खः । अथे हे थीथी थासय् भगवान बुद्धया मूर्तियात खतय् तयाः देय् चाःहीकेगु ज्या नं जूगु खः । थीथी थासय् स्कूलया विद्यार्थीतय्सं ब्यानर ज्वनाः ¥याली नं पिकाःगु खः । अथे हे बहनी लुम्बिनीया मायादेवी देगः लगायत थाय्थासय् मत च्याकाः दिपावली नं याःगु खः ।