चंकि पाण्डेया म्ह्याय्या डेब्यु
बलिउडया पुलांम्ह अभिनेता चंकि पाण्डेया म्ह्याय् अनन्या पाण्डें नं बलिउडय् डेब्यु याःगु दु । वयागु डेब्यु फिल्म स्टुडेन्ट अफ द इयर –२ वंगु शुक्रवाः रिलिज जूगु दु । बलिउडया नांजाःम्ह निर्माता निर्देशक करण जौहरं अनन्यायात थःगु फिल्मय् डेब्यु याकूगु खः । अनन्या डेब्यु फिल्म करणं हे दयेकूगु हिट फिल्म स्टुडेन्ट अफ द इयरया सिक्वेल खः ।
थ्व फिल्म पाखें थौंकन्हय् बलिउडय् चर्चितपिं बरुण धवन व आलिया भट्ट चर्चाय् वःगु खः ।करणया म्हिगः रिलिज जूगु सिक्वेल फिल्मं अनन्याया लिसें तारा सतारियां नं डेब्यु याःगु दुसा थुकी मू भूमिका टाइगर श्राफं नं म्हितातःगु दु ।
अनन्यां फिल्मय् वये न्ह्यवनिसें हे थःत अभिनयया शोक दुगु खँ धासें मचाबलय् निसें शाहरुख खानया म्ह्याय् सुहाना खान, संजय कपूरया म्ह्याय् शनाया कपूर लिसे अभिनय यानाः म्हिता वयाच्वनागु खँ कंगु दु । थथे म्हितेबलय् थः मां भावना पाण्डेया भूमिकाय्, सुहानां थः मां गौरी खानया भूमिका अभिनय यायेगु खँ वं मिडिया लिसे खँल्हासें कंगु दु ।
LEAVE YOUR COMMENTS