स्वनिगःया मेयरपिंसं प्रम नापलाइगु
नगरपालिका फोरम व प्राधिकरण दथुइ शितयुद्ध
येँ – निर्वाचित स्थानीय सरकारयात निर्देशन बीगु ज्या यानाच्वंगु उपत्यका विकास प्राधिकरण खारेज याकेगु लागिं आः स्वनिगःया उपत्यका नगरपालिका फोरमं तप्यंक प्रधानमन्त्री हे नापलाइगु जूगु दु ।
येँ महानगरपालिकां जारी याःगु भवन निर्माण सम्बन्धी मापदण्ड विरुद्ध उपत्यका प्राधिकरणं निर्देशन बीगु लिसें अदालतय् मुद्दा तयेगु समेत ज्या यानाः निर्वाचित सरकारयात हे हाथ्या बीगु ज्या यानाच्वंगुलिं आः उपत्यका नगर–पालिका फोरमं प्रधानमन्त्रीयात हे नापलानाः थुकिया बारे खँ ल्हायेत्यनागु खँ फोरमया सचिव लिसें थिमि नपाया मेयर मदनसुन्दर श्रेष्ठं ‘नेपालभाषा टाइम्स’ कनादिल ।
थुकिया बारे थःपिनि दथुइ खँ जुयाच्वंगु जानकारी बिसें प्रमयात छगू ज्ञापनपौ समेत बीगु तयारी जुयाच्वंगु खँ नं वय्कलं कनादिल । नगरपालिका फोरमं छुं न्हि न्ह्यः तिनि छगू पत्रकार सम्मेलन हे यानाः उपत्यका प्राधिकरण खारेज यायेमाःगु माग याःगु खः । थ्व स्वयां न्ह्यः येँ महानगरपालिकां जक प्राधिकरण खारेजीया माग याःगु खः ।
नगरपालिका फोरमपाखें प्राधिकरण खारेज यायेमाः धकाः माग यायेवं प्राधिकरणया आयुक्त भाइकाजी तिवारीं झन् कडा लिसः बियाहःगुलिं थःपिंसं उकियात गम्भीर रूपं कयागु खँ नं सचिव श्रेष्ठं कनादिल । म्हिगः येँ मनपाया ग्वसालय् जूगु छगू ज्याझ्वलय् नं स्वनिगःया मेयरपिनि दथुइ थुकिया बारे सहलह जूगु खः ।
थौं यलय् शताब्दीपुरुष सत्यमोहन जोशीयात याइगु हना ज्याझ्वलय् नं स्वनिगःया सकलें मेयरपिं वनाः ब्वति कायेगु व वयां लिपा थुकिया बारे नं सहलह यायेगु खँ सचिव श्रेष्ठं कनादिल ।
वय्कलं म्हिगः नियन्त्रित अवधारणा कथं स्वनातःगु संस्थां थौं परिवर्तित इलय् नं वहे कथं निर्वाचित मेयरपिंत निर्देशन बीगु छुं नं कथं मिले मजू धासें आः सिंहदरवारया अधिकार गांगामय् थ्यनेधुंकूगु अवस्थाय् थज्याःगु निकाय आवश्यक हे मजूगुलिं उकियात खारेज यायेगु बाहेक मेगु विकल्प मदुगु खँ नं वय्कलं कनादिल ।
येँ मनपां जारी याःगु भवन माप–दण्ड विरुद्ध भाइकाजी तिवारीं सर्वोच्च अदालतय् रिट तःगु खःसां अदालतं मनपाया मापदण्ड खारेज यायेम्वाःगु आदेश बिउगु खः । थ्व स्वयां न्ह्यः भाइकाजी तिवारीं सडक विस्तार विरुद्ध सर्वोच्च अदालतं याःगु फैसला उल्टे यायेत निवेदन दर्ता याःगु खःसा सर्वोच्चं उगु निवेदनयात नं खारेज याना बिउगु खः ।तिवारीं स्वनिगलय् सुं आदिवासी धइपिं हे मदु धकाः स्थानीयवासीयात हाथ्या बीगु ज्या तकं याःगु खः ।
LEAVE YOUR COMMENTS