
येँ – सरकारं निजामती कर्मचारीतय्सं सरकार विरुद्ध सामाजिक सञ्जाल मार्फत आलोचना तकं याये मदइगु व्यवस्था यायेत्यंगु दु । निजामती कर्मचारी सम्बन्धी सरकारं हयेत्यंगु न्हूगु विधेयकय् सरकारया नीतियात कयाः कर्मचारीतय्सं आलोचना याये मजिउगु खँ न्ह्यथनातःगु दु ।
सरकारं संघीय निजामति सेवाया गठन, सञ्चालन व सेवा शर्त सम्बन्धय् व्यवस्था यायेगु निंतिं न्हूगु विधेयक हयेत्यंगु खः । थ्व विधेयकय् न्ह्यथनातःकथं सरकारया नीति विरुद्ध निजामति कर्मचारीतय्सं लेख नं पिथने दइ मखु, अथेहे संचार माध्यमयात छुं खबर नं बी दइ मखु ।
विधेयकया परिच्छेद ९ या आचरण ७५ य् न्ह्यथनातःगु दु, ‘नेपाल सरकारया नीति अःखः जुइकथं वा नेपाल सरकार व जनताया पारस्परिक सम्बन्ध वा छुं नं विदेशी राष्ट्रलिसेया स्वापू स्यनीकथं सुं नं निजामति कर्मचारीं वास्तविक वा काल्पनिक नामं लेख प्रकाशन, मन्तव्य बीत व सामाजिक संजालय् प्रतिक्रिया नं व्यक्त याये मजिउ ।’
अथेहे विधेयकय् निजामति कर्मचारीत राजनीतिक दल वा संगठनया सदस्य जुइगु, राजनीतिक क्रियाकलापय् संलग्न जुइ व मेमेगु राजनीतिक गतिविधिइ ब्वति काये मदइगु खँ नं न्ह्यथनातःगु दु ।थुलि जक मखु अवकाश कायेधुंकूपिं सरकारी कर्मचारीतय्सं नं थज्याःगु क्रियाकलाप याये मजिउ ।
पेन्सन कयाच्वंपिं कर्मचारीतय्सं नं थथे आलोचना यात धाःसा ऐन कथं कयातःगु सेवा सुविधा पने फइगु खँ विधेयकय् न्ह्यथनातःगु दु ।
अथेहे निजामति कर्मचारीतय्सं व्यापार व्यवसाय याये मजिउगु, सरकारी सेवाय् दुगु इलय् परमर्शदाता, सल्लाहकार विशेषज्ञ व मेगु छुं नं हैसियतय् सेवा बी मजिउगु खँ नं न्ह्यथनातःगु दु ।
LEAVE YOUR COMMENTS