राष्ट्रिय ज्ञानमालाया ज्यासना पुचःयात भिंतुना देछा

किपू – नेपाल राष्ट्रिय ज्ञानमाला समितिया न्हूगु ज्यासना पुचःया नवनिर्वाचित पदाधिकारीपिंत भिंतुना देछायेगु ज्याझ्वः जुुल । श्रीकीर्ति ज्ञानमाला भजन खलः, नगरमण्डप श्रीकीर्ति विहार किपूया ग्वसालय् उगु ज्याझ्वः जूगु खः । भजन खलःया नायः श्रीकृष्ण महर्जनया सभापतित्वय् जूगु ज्याझ्वलय् भिक्षु शोभित महास्थविरं पंचशील बियाबिज्याःगु खःसा समितिया संरक्षक, सल्लाहकार नापं नवनिर्वाचित पदाधिकारीपिंत खादा क्वखायेकाः सम्मान याःगु खः । ज्याझ्वलय् महन्त महर्जनं लसकुस यानादीगु खःसा नगां भजन खलःया सचिव बेखाराम महर्जनं भिंतुना न्वचु बियादीगु खः ।

ज्याझ्वलय् ज्ञानमाला समितिया महासचिव इन्द्रमुनि शाक्यं ज्ञानमालाया विकास व विस्तार याना यंकेगु योजनाकथं क्षेत्रीय उपसमितित गठन याना यंकेगु नापं क्षेत्रगत रुपं ज्याझ्वः न्ह्याका वनेगु योजना दुगु जानकारी बियादिल । लिसें वय्कलं भगवान बुद्धं बियाबिज्याःगु उपदेशकथं पंचशील पालना यायेमाःगु व उकिया निंतिं अभियान न्ह्याका वनेत ज्ञानमाला कोष वृद्धि याना वनेगु योजनाया बारे नं कनादीगु खः ।

समितिया अध्यक्ष मय्जु रमना श्रेष्ठं ज्ञानमालाया प्रचार प्रसार यायेगु ल्याखं जुइगु ज्याझ्वलय् सकल उपासकउपासिकापिं उपस्थिति जुयाः ग्वाहालि याइगु आशा यानादिल । समितिया संरक्षक प्रा. सुवर्ण शाक्यं नेपाःया सकल ज्ञानमाला भजन खलःत छप्पँ छधी जुयाः न्ह्याः वनेमाःगु खँय् बः बियादिसें भगवान बुद्धया वचन सकसिनं पालना यायेमाः धयादिल । भिक्षु शोभित महास्थविरं धर्मदेशना बियाबिज्याःगु ज्याझ्वलय् समितिया सल्लाहकार किरणकुमार जोशी, शान्तकुमार चित्रकारपिनिगु नं उपस्थिति दुगु खः ।