ब्रुमर संचालनय् समस्या

येँ महानगरपालिकाया सतकय् वंगु लछि न्ह्यवंनिसें ब्रुमर संचालन जुयाच्वंगु दु, तर सतकया धू नियन्त्रणय् धाःसा वये फयाच्वंगु मदु । स्वनिगलय् अप्वःथें वा वयाच्वनीगुलिं यानाः ब्रुमरं नियमित रुपं सतकया धू सफा याये मफयाच्वंगुलिं जनअपेक्षाकथं धू म्हो जुइ मफुगु येँ महानगरपालिका वातावरण विभागं न्ह्यथंगु दु ।

‘छखे वा वयाच्वंगु दुसा, मेखे लःया कारणं जुइगु ध्याचः व चा यातायातया सवारी साधनलिसें वइगु जूगुलिं नं समस्या जुयाच्वंगु खः’, विभागया प्रमुख हरिकुमार श्रेष्ठं धयादिल, ‘संचालनय् दुगु न्यावः ब्रुमरं आतकया दुने २२० टन धू संकलन याये धुंकूगु दु ।’ संकलन जूगु दक्वं धू टेकुइ व्यवस्थापन याःगु दु ।

महानगरया सतकय् ब्रुमर संचालन जूगु थ्व हे वइगु बैशाख २८ गते नं लछि थ्यनेत्यंगु दु । वंगु फागुन २८ गते इटालीं हःगु ब्रुमर संचालनया निंतिं येँ मनपां न्यागू रुट क्वःछिउगु दु । व हे रुट अनुरुपय् ज्या जुयाच्वंगु खःसां नं दक्वं दिनय् ज्या यायेगु वातावरण मदुगुलिं समस्या जुयाच्वंगु धाःगु दु ।

विभागया प्रमुख श्रेष्ठया कथं मेगु मुख्य समस्या धइगु सतकय् च्वंगु गाः खः । उकिया समाधानया निंतिं सडक विभागयात नं इनाप याःगु दु । नियमित रुपं वा वइगु व सतकया थाय्थासय् गाः दुगु कारणं ब्रुमर संचालनय् समस्या खने दयाच्वंगु दु । १० गू करोड ८० गू लाख लागतय् ब्रुमर हःगु खः ।

न्यागः ब्रुमरमध्ये प्यंगः १६ टन क्षमता बराबरया खःसा मेगु छगः ६ टन क्षमताया दु । थुपिं ब्रुमरं न्हिं १० किलोमिटरतकया धू संकलन याये फइगु क्षमता दु । युरो मापदण्डया धयातःगु उगु ब्रुमरया न्ह्यःने, दथुइ व लिउनेया भागय् जवंखवं यानाः प्लाष्टिकया प्यंगू ब्रुससहित धू साले फइगु शक्तिशाली पाइप जडान यानातःगु दु ।

सतकय् थाय्थासय् गाः वनाच्वंगु व भुखाय् कारणं दुनाच्वंगु संरचना पुनःनिर्माणया ज्या नं समस्या जूगु विभागं न्ह्यथंगु दु । मुख्य सतक लुँहितिस्थित धरहरा, दरवार हाईस्कुल, रानीपुखू, काठमाडौं भ्यू टावर, बसपार्कय् थीथी थासं वये वने यानाच्वनीगु सवारी साधनं हइगु ध्याचःगु चाया कारणं सफा यायेत समस्या जूगु महानगरया वातावरण विभागं न्ह्यथंगु दु ।

कानूनी रुपय् च्यागू मिटर स्वयां म्हो ब्या दुगु सतक जक महानगरया जिम्मेवारी लाःसा मेगु सतक सडक विभागया मातहतय् दु । येँ मनपाया नागरिकं धाःसा ब्रुमर प्रयोगय् वःसां नं सतक सफा मजूगु धासें असन्तुष्टि प्वंकेगु यानाच्वंगु दु । कालिमातिया स्थानीयवासी विष्णु कँडेलया कथं ब्रुमर संचालनय् वःगु लछि फुइ त्यंगु दु धू धाःसा म्हो जूगु खने दयाच्वंगु मदु ।

समस्या गथे खः, अथे हे खने दयाच्वंगु दु । थ्व अवस्था जुयाच्वनीगु खः धइगु जूसा थिकेक ध्यबा खर्च यानाः ब्रुमर न्यायेगु छुं नं अर्थ मदुगु वय्कलं धयादिल । अथे हे बागबजाः, पुतलीसतक, भद्रकाली, ल्हुति लायतया थासय् नं धू म्हो मजूगु स्थानीयवासीया धापू दु ।

 

सम्बन्धित बुखँ

LEAVE YOUR COMMENTS