आः जग्गा दलालत काँठपाखे

स्वनिगःया काँठ लागाय् जग्गाया ब्यापक प्लटिङ

येँ – रिङरोड क्षेत्र दुने जग्गा अभाव जुइवं आः जग्गा दलालत येँ, यल व ख्वपया काँठ लागाय् व्यवसाय विस्तार यायेत सक्रिय जुयाच्वंगु दु । स्वंगुलिं जिल्लाया काँठ क्षेत्रय् जग्गा प्लटिङ यायेगु ज्या थौंकन्हय् तीव्र रुपं न्ह्यानाच्वंगु दु । थौंकन्हय् काँठ क्षेत्रय् च्वंगु जग्गा प्लटिङ यायेगु ज्याय् थीथी जग्गा दलाल सम्बन्धी कम्पनी सक्रिय जुयाच्वंगु दु ।

दलालतय्सं जग्गा प्लटिङ यायेगु झ्वलय् वातावरणीय प्रभाव मूल्यांकन आदि मयाःगुलिं थ्व ज्यां यानाः स्वनिगःया वातावरणय् लिच्वः लाये फइगु खँ धाःगु दु । प्लटिङ यायेगु झ्वलय् न्हापा काँठ क्षेत्रय् दुगु जग्गाय् बुया वयाच्वंगु आपालं सिमा पालेगु ज्या जुयाच्वंगु खःसा थुकिं यानाः स्वनिगलय् प्रदुषण अप्वया वनीगु खँ सम्बन्धित विज्ञतय्सं धाःगु दु ।

दुगु खुल्ला थासय् मुक्कं छेँ जक जुल धाःसा थनया वातावरण तच्वकं स्यने फइगु खँ वातावरणविद्तय्सं धयाच्वंगु दु । जग्गा प्लटिङ यानाच्वंपिंसं वातावरणयात स्वयां नं थःत फाइदा जुइकथं प्लटिङ यानाच्वंगुलिं छुं ईया दुने हे स्वनिगलय् थीथी कथंया पर्यावरणीय समस्या वये फइगु खँ नं धाःगु दु ।

उपत्यका विकास प्राधिकरणं स्वनिगलय् जग्गा प्लटिङ यायेगु लागिं झिंन्हय्गू कम्पनीयात अनुमति बियातःगु दु । थ्व कम्पनीतय्सं ३०० रोपनी जग्गा दुने ६०० स्वयां अप्वः कित्ता पिकायेगु कथं प्लटिङ यानाच्वंगु खँ धाःगु दु । थुकी मध्ये दकलय् अप्वः यलय् झिगू कम्पनीं जग्गा प्लटिङ यानाच्वंगु दुसा येँय् खुगू कम्पनीं जग्गा प्लटिङ यानाच्वंगु दु ।

अथे हे ख्वपय् छगू कम्पनीं जग्गा प्लटिङ यानाच्वंगु दु । स्वनिगलय् आः मनूतय् चाप अप्वयाः स्वनिगः हे अस्तव्यस्त जुयाच्वंगु दुसा खाली दुगु जग्गाय् नं थप छेँ दन धाःसा जनसंख्याया चाप अप्वयाः मेमेगु सामाजिक समस्या समेत ब्वलनेफुगु खँ धाःगु दु । स्वनिगलय् खुल्ला थाय्या नापनापं हरियाली नं म्हो जुयाः समस्या ब्वलने फइगु खँ वातावरणविद्तय्सं धाःगु दु ।

अथे हे जनसंख्या अप्वयेवं यातायात साधन अप्वया वनाच्वंगुलिं उकियात व्यवस्थापन यायेत नं थप समस्या जुइफइगु खँ धाःगु दु । जग्गा प्लटिङ यायेगु ज्या योजनावद्ध रुपं मजुसे हचुवाया भरय् जुयाच्वंगुलिं थुकिं कन्हय् वनाः समस्या जुइ फइगु खँ विज्ञपिंसं धाःगु दु ।

पहाडय् डोजर लगे यानाः जग्गा
जग्गा व्ययवसाय् सक्रिय जुयाच्वंपिं मनूतय्सं धाःकथं थौंकन्हय् काँठ लागाय् नं जग्गा मगानाः नापसं च्वंगु दुम्बः व पहाडी लागाय् समेत डोजर लगे यानाः सम्म यायेगु ज्या यानाच्वंगु दु । दलालतय्सं थौंकन्हय् मनूतय्त अज्याःगु पहाडय् डोजर चले जुयाच्वंगु क्यनाः बैना याकेत स्वयाच्वंगु खँ धाःगु दु ।