उत्साहहीन मतदान, देय्न्यंकं ६१ प्रतिशत जक मत कुहां वन
येँ (नेपालभाषा टाइम्स)- प्रतिनिधि सभा व प्रदेशसभा सदस्यया लागिं म्हिगः देय्न्यंकं जूगु निर्वाचनय् मुक्कं ६१ प्रतिशत जक मतदान जूगु दु । निर्वाचन आयोगं थ्व प्रारम्भिक तथ्यांक सार्वजनिक याःगु खः ।
निर्वाचन आयोगं थ्व चुनावय् ७० प्रतिशत मत कुहां वनीगु अनुमान याःगु खः । तर मतदातायाके खने दुगु निराशां यानाः मतदान उत्साहवद्र्धक मजूगु खँ धाःगु दु ।
देय्न्यंकं छिटपुट घटना बाहेक निर्वाचन धाःसा शान्तिपूर्ण रुपं क्वचाःगु दावी आयोगं दु । तर न्हिनय् १२ बजे तक नं मतदान याइपिं म्हो जक खनेदयेवं निर्वाचन कर्मचारीतय्सं कम जक भोट कुहां वनीगु अनुमान यायेधुंकूगु खः ।
मतदानया झ्वलय् थीथी विवाद व झडपया कारणं ७५ थासय्मतदान स्थगित जूगु खःसा लिपा राजनीतिक पार्टीया प्रतिनिधि दथुइ सहलह यानाःलि ६० थासय् मतदान जूगु खः । विवाद व झडपया झ्वलय् रौतहट, सिराहा, चितवन, दोलखा, बाजुरा, डोटी व हुम्लाय् गोली चले जूगु खः । निर्वाचन स्यंकेगु, मतपेटिका लाकाकायेगु कुतः यायेवं अन प्रहरीं गोली चले याःगु खः ।
अथे हे रुकुम पश्चिमय् निर्वाचन ज्याझ्वलय् पंगः थनेत स्वःपिं नेत्रविक्रम चन्दया स्वम्ह कार्यकर्तायात ज्वंगु दु । उमिसं जिल्लाया आठबीसकोट नगरपालिकाया वडा ५, ११ व १३ नम्बर वडाय् मतपत्र खुइत स्वःगु खः । ज्वंपिं कार्यकर्तात महेश बस्नेत, हरि पुन व राकेश विक खः । मतदान ज्याझ्वलय् पंगः थनेत स्वयेवं उमित ज्वंगु खँ प्रहरीं धाःगु दु । मतदान यायेत थप प्रहरी बल छ्यलाः निर्वाचन सुचारु याःगु खः । चन्द नेतृत्वया नेकपां घोषित रुपय् चुनाव बहिष्कार यायेगु लिसें चुनावयात स्यंकेगु घोषणा याःगु खः ।
थ्वहे झ्वलय् निर्वाचन ज्याय् खटेजूपिं निम्ह कर्मचारी सीगु दु । सोलुखुम्बु जिल्लाया नेचासल्यान गाउँपालिका–४ मतदान केन्द्र मतदान अधिकृतया रुपय् खटे जूम्ह बिल्टु राय शनिवाः सुथय् सिनाच्वंगु अवस्थाय् लूगु खः । अथे हे धनकुटाया साँघुरीगढी–३ मतदान केन्द्रया सहायक कर्मचारी कथं खटे जूम्ह पवित्रा लिम्बु नं बिरामी जुयाः वासः यायेगु झ्वलय् मदुगु खँ आयोगं धाःगु दु । आयोगं सीपिं कर्मचारी प्रति श्रद्धाञ्जली प्वंकूगु दु ।
LEAVE YOUR COMMENTS