तातोपानी नाका चायेकेत तीव्रगतिं ज्या
येँ – वि.सं. २०७२ या तःभुखाय् लिपा बन्द जुयाच्वंगु सिन्धुपाल्चोकया तातोपानी नाका चायेकेगु निंतिं तीव्रगतिं ज्या जुयाच्वंगु दु । वइगु जेठया स्वंगूगु वा दुने नाका चायेकेगु ज्याझ्वः कथं अरनिको राजमार्गया बाह्रबिसे–तातोपानी खण्डया सतक व ताँ दयेकेगुज्या तीव्र गतिं जुयाच्वंगु दु ।
मेखे लार्चाय् दयेकूगु सुख्खा बन्दरगाह म्हिगः बुधवाः हस्तान्तरण यायेगु धाःसां ज्याय् लिबाःगु कारणं लछि लिपा जक हस्तान्तरण जुइगु खँ उद्योग वाणिज्य तथा आपूर्ति मन्त्रालयया सहसचिव रविशंकर सैंजुं धयादीगु दु ।
बन्द नाका चायेकेगु निंतिं परराष्ट्रमन्त्री प्रदीप ज्ञवाली, भौतिक पूर्वाधार तथा यातायात मन्त्री रघुवीर महासेठ, सांसद अग्नी सापकोटा, घनश्याम भुसाल, प्रधानमन्त्रीया राजनीतिक सल्हाकार विष्णु रिमाल व परराष्ट्र सल्लाहकार डा. राजन भट्टराई, राष्ट्रिय पुनःनिर्माण प्राधिकरणया कार्यकारी अधिकृत सुशील ज्ञवालीया पुचलं वंगु चैत २६ गते स्थलगत निरीक्षण यानाः याकनं ज्या सिधयेकेत सम्बन्धीत निकाययात निर्देशन बिउगु खः ।
बाह्रबिसे नगरपालिका अन्तर्गत लाःगु गातिको बसेरी निसें सीमाया ताँ तक सतक दयेकेगु ज्या चिनियाँ पक्षं क्वचायेधुंकूगु दु । अथेहे सीमाया ताँ वइगु लछि दुने दयेके क्वचायेकेगु लक्ष्य कथं २४सै घण्टा ज्यामित खटे जुयाच्वंगु खँ भोटेकोशी गाउँपालिकाया अध्यक्ष राजकुमार पौडेलं धयादीगु दु ।
लार्चाय् दयेकाच्वंगु अत्याधुनिक सुख्खा बन्दरगाह नं चिचिधंगु ज्या बाहेक फुक्कं ज्या क्वचायेधुंकूगु दु । बाह्रबिसे निसें बसेरी सतकय् लाःगु जग्गाया निगू किलोमिटर भाग जक ग्राभेल यायेधुंकूगु उगु साइट स्वइगु सडक डिभिजन कार्यालय दोलखाया इन्जिनियर प्रदीप निरौलां कनादीगु दु ।
थगुने वा वयाः चुइकायंकूगु बाह्रबिसेया र्खासनीबारीया साँदी खुसिइ पक्की ताँया थासय् वइगु वालय् बेलिब्रिज जडान याइगु जूगु दु । पक्की ताँ दयेकेत बजेट माग याःसां अर्थ मन्त्रालयं चालु आर्थिक दँय् बजेट निकासा मयाःगुलिं विकल्पया रुपय् बेलिब्रिज तयेमाःगु खँ इन्जिनियर निरौलां कनादिल ।
LEAVE YOUR COMMENTS