विप्लवया बन्दय् थाय्थासय् बम

येँ – नेपाल कम्युनिष्ट पार्टी ‘विप्लवं’ म्हिगः आह्वान याःगु नेपाल बन्दया झ्वलय् थाय्थासय् बम मूगु दुसा आपालं थासय् शंकास्पद वस्तु लूगु दु । म्हिगः पोखराय् बम डिस्पोज यायेगु झ्वलय् बम मुयाः छम्ह सैनिक घाःपाः जूगु दु । पोखरा महानगरपालिका–३ य् प्रदेशसभा भवन लिकसं तयातःगु बम डिस्पोज यायेगु झ्वलय् बम मुयाः सैनिक अमलदार धर्म थापा घाःपाः जूगु खः ।

प्रदेशसभा भवन न्ह्यःने निषेधित क्षेत्रय् भ्वँतय् प्वःचिनातःगु डेटोनेटर लूगु खः । उकियात निष्कृय यायेगु झ्वलय् थम्हं ज्वनातःगु बारुद मुयाः थापा घाःपाः जूगु खः । थापायात म्हिगः हे वासः याकेत येँय् हःगु दु । उकथं हे पूर्वी नवलपरासीस्थित कावासोतीया इन्द्रचोकय् नं बम मूगु दु । जिल्ला प्रहरी कार्यालयं ४०० मिटर पश्चिम व्यस्त बजाःया लिकसं बम मूगु खः ।

उकी मानवीय क्षति धाःसा मजूगु खँ धाःगु दु । उगु थासय् प्रहरीं शंकास्पद वस्तु लुइकूगु दु । अथेहे पाल्पाय् नं बम मूगु दु । जिल्लाया रिब्दीकोट गाउँपालिका ज्याकु दुगु भवनय् बम मूगु खः । प्रहरीया कथं बम मुयाः ज्याकू दुगु छेँय् क्षति जूगु दु ।

म्हिगः थीथी थासय् बम मुइगु व शंकास्पद वस्तु लुइवं जनजीवन त्रस्त जूगु दु । पनौतिया खोपासी वनेगु लँय् शंकास्पद वस्तु लूगु खःसा उकियात सेनां निष्क्रिय याःगु दु । उकथं हे भैरहवाय् नं बम लूगु दु । उकियात नं सेनां निष्क्रिय याःगु खः । बन्दया झ्वलय् म्हिगः मकवानपुरय् निगः गाडीइ मि तया बिउगु दु ।

सम्बन्धित बुखँ

LEAVE YOUR COMMENTS