शुक्रवाः निसें गैरआवासीय नेपाली विज्ञ सम्मेलन

येँ – गैरआवासीय नेपाली विज्ञतय् न्हापांगु विश्व सम्मेलन कन्हय् शुक्रवाः निसें येँय् सुरु जुइत्यंगु दु । वैदेशिक रोजगारीइ वनाच्वंपि नेपालीतय्सं सयेकातःगु ज्ञान, सीप व पूँजी लगानी यानाः समृद्ध राष्ट्र दयेकेगु लक्ष्य तयाः न्हापांखुसी विज्ञतय् विश्व सम्मेलन यायेत्यनागु खँ गैरआवासी नेपाली संघ अन्तर्राष्ट्रिय समन्वय परिषद (एनआरएनएं) बुधवाः छगू पत्रकार सम्मेलन यासें जानकारी बिउगु दु ।

गैर आवासीय नेपाली दिवसया झ्वलय् असोज २६, २७ व २८ गते थ्व सम्मेलन यायेत्यंगु खः । सम्मेलनय् थीथी देशय् ज्या यानाः नां कमे यानाच्वंपिं विज्ञतय्सं १६० गू कार्यपत्र न्ह्यब्वइगु व ८० म्हेसिनं टिप्पणी याइगु खँ एनआरएनएया अध्यक्ष भवन भट्टं कनादीगु दु । वय्कलं थ्व सम्मेलन देय्या आर्थिक विकासया निंतिं बल्लाःगु तिबः जुइगु खँ धयादीगु दु ।

एनआरएनएया उपाध्यक्ष डा. हेमराज शर्मां सम्मेलनय् ३५० म्हे विज्ञतय्सं सहभागी दइगु खँ कनादिल । ‘झीगु देय् झी थःपिंसं हे दयेकेत सक्षम दु धयागु खँय् राज्ययात आत्मविश्वास ब्वलंकेगु जुइ’ शर्मां पत्रकार सम्मेलनय् धयादीगु दु, ‘थ्व ऐतिहासिक व न्हापांगु सम्मेलन खः । थुकिं लगानी दुकायेत ग्वाहालि जुइ ।’

‘झीगु देय् झी थःपिंसं हे दयेकेत सक्षम दु धयागु खँय् राज्ययात आत्मविश्वास ब्वलंकेगु जुइ’

थ्व सम्मेलनय् न्हापांखुसी विधान संशोधनया विषय नं प्रवेश जुइगु खँ धाःगु दु । आः स्वम्ह उपाध्यक्ष दुगुलिं थुकियात संशोधन यानाः न्याम्ह विषयगत उपाध्यक्ष दयेकेगु व निदँया कार्यकालयात स्वदँ यायेगु कथं विधान संशोधन जुइत्यंगु खः । विज्ञ सम्मेलनय् नीतिगत विषय, कृषि, जलविद्युत, यातायात, वातावरण प्रदूषण नियन्त्रण, पिनें सयेकावःगु ज्ञान–सीपया उपयोग व समस्या बारे सहलह जुइगु लिसें अन्वेषणय् सहभागी विज्ञ, लगानीकर्ता व नीति निर्मातय् दथुइ अन्तक्र्रिया जुइ ।

पत्रकार सम्मेलनय् एनआरएनएया महिला उपाध्यक्ष सफिला राजभण्डारीं भुखाचं क्षति जूगु गोरखाया लाप्राक गामय् नमूना बस्ती दयेकेगु ज्या ७० प्रतिशत पूवनेधुंकूगु व वइगु वैशाख १२ गते उगु गां हस्तान्तरण यायेगु योजना दुगु खँ कनादिल । एनआरएनं भुखाचं क्षति जूगु द्वःछिखा छेँ दयेकाबीगु घोषणा याःगु खः ।

लाप्राकय् आः १८ हेक्टर क्षेत्रफलय् ५७६ खा छेँ दयेकाच्वंगु खँ राजभण्डारीं कनादिल । थ्वहे झ्वलय् गैरआवासीय नेपाली संघ अन्तर्राष्ट्रिय समन्वय परिषदं दयेकाबिउगु शंखमूल पार्क थौं बिहिवाः यल महानगरपालिकायात हस्तान्तरण याइगु जूगु दु । थ्व पार्क थ्यंमथ्यं स्वंगू करोड तका खर्च यानाः दयेकूगु खः ।

झिगू अर्बया कोषअध्यक्ष भट्ट झिगू अर्बया कोष संलकन पूवन धायेवं नेपालय् लगानी अप्वइगु खँ धयादीगु दु । वय्कलं कोष दयेकेगु ज्या न्ह्यानाच्वंगु व थुकियात मंकाः लगानी कोष कथं दयेकेगु उद्देश्य दुगु खँ नं कनादीगु दु । कोषय् नेपाः सरकारया ५, एनआरएनएया ५, स्थानीयवासीया ५ व ८५ प्रतिशत एनआरएनया नेतृत्वय् सर्वसाधारणया लगानी दइ । एनआरएनए दिवसया झ्वलय् बिहिवाः माइतीघर मण्डलया ध्वाँय् ब्वयेकेगु ज्याझ्वः नं तयातःगु दु ।