सूर्य नेपाल ४५३ प्रतिशत लाभां बीगु
येँ -÷ नेपालय् दकलय् अप्वः कर पुलाः नेपाल सरकारपाखें सम्मानित जुया वयाच्वंगु सूर्य नेपालं लगानीकर्तायात ४५३ प्रतिशत लाभांश बीगु जूगु दु । कम्पनीं आर्थिक दँ २०७४÷७५ या नाफापाखें शेयरधानीयात लाभांश बीत्यंगु खः । वंगु आर्थिक दँ २०७३÷७४ सं दकलय् अप्वः कर पूगु धासें थुगु कम्पनीयात सरकारं वंगु मंसिर १ गते सम्मान याःगु खः ।
कम्पनीं हरेक दँय् अप्वः कर पुलिगु कम्पनी मध्येपाखे सम्मान जुया वयाच्वंगु दु । कम्पनीया चुक्ता पुँजी २ अर्ब १ करोड दु । कम्पनीं लाभांश स्वरुप लगानीकर्तायात ९ अर्ब १२ करोड तका ध्यबा वितरण याइगु जूगु दु । थुगु कम्पनी ६१ प्रतिशत लगानी विदेशया दुसा ३९ प्रतिशत नेपाःमिया लगानी दु ।
लाभांश वापत थुगु कम्पनीया प्रवद्र्धक भारतया आईसीटी लिमिटेडं ५ अर्ब ५६ करोड तका दइसा नेपाःया लगानीकर्तायात धाःसा ३ अर्ब ५५ करोड टका लाभांश वापत काये खनिगु जूगु दु । सूर्य नेपालं प्रवद्र्धक आईसीटी इन्डियायात लाभांश भुक्तानी बीत थ्यंमथ्यं ५ अर्ब ५६ करोड तका बराबरया विदेशी मुद्रा सटही सुविधा बीत माग याःगु दु ।
लाभांश वापत सटही भुक्तानी अप्वः माग याइगु एनसेल लिपा सूर्य नेपाल निगूगु कम्पनी खः । विदेशी मुद्रा संचिति म्हो जुया वयाच्वंगु झ्वलय् नेपला सरकारया निंतिं तःधंगु व अधिक नाफा याइगु कम्पनीयात विदेशी मुद्राय् लाभांश भुक्तानी बीगु ज्या चुनौतिपूर्ण जुया वनाच्वंगु दु ।
सूर्य नेपालं नेपाःया चुरोट बजारय् ९० प्रतिशत स्वयां अप्वः बजाः कयाच्वंगु दु । लिपांगु इलय् कम्पनीं सलाई, धुप उद्योगय् लगानी विस्तार यानाच्वंगु दु । लिसें कम्पनीं विदेशी ब्राण्डया तयारी वसः आयात नं याना वयाच्वंगु दु ।
LEAVE YOUR COMMENTS