पुँजी वृद्धि यायेत मुद्रा कोषया सुझाव

येँ – अन्तर्राष्ट्रिय मुद्रा कोषं वाणिज्य बैंकया पुँजी अप्वयेकेत सुझाव बिउगु दु । मुद्रा कोषया पुचलं राष्ट्र बैंकया उच्चपदस्थ अधिकारीलिसें नाप लायेगु झ्वलय् पुँजी वृद्धि यायेत सुझाव बिउगु खः । नेपाःया बैंकया त्यासा विस्तारय् आक्रमक जुयाः च्वंगुलिं जोखिम अप्वया वनाच्वंगु धासें पुँजी वृद्धि यायेत सुझाव बिउगु खः ।

चालू आर्थिक दँय् बैंकतय्सं निक्षेपया तुलनाय् त्यासा विस्तार निदुगँ अप्वयेकूगु दु । वार्षिक विन्दुया आधारय् बैंकया लगानी २५ प्रंतिशत स्वयां अप्वःगु दु । तर राष्ट्र बैंक धाःसा त्यासा वृद्धिदर २० प्रंतिशत जक तयातःगु खः । मुद्रा कोषं वित्तिय स्थायित्वया चिन्ता कासें पुँजी अप्वयेकेत धाःसां नं तत्काल पुँजी अप्वयेके फइगु अवस्था मदुगु खँ धाःगु दु ।

थौंकन्हय् बैंकतय्सं पुँजी कोष अनुपात ११ प्रतिशत कायम यायेमाःगु व्यवस्था दु । तर मुद्रा कोषं बैंकतय् आक्रमण बजार विस्तारया कारणं यानाः उकियात अप्वयेकाः १३ प्रतिशत स्वयां अप्पवः थ्यंकेमाःगु सुझाव बिउगुृ दु । मुद्रा कोषया सुझाव कथं १३ प्रतिशत स्वयां अप्वः पुँजी कोष अनुपात अप्वयेकेगु खःसा पुँजी अप्वयेकगु बाहेक वाणिज्य बैंकतय्के मेगु विकल्प मदुगु खँ धाःगु दु ।

कोषया सुझाव कार्यान्वयन यायेगु खःसा न्यागू खुगू बैंकयात अपुइ फुसा आपालं धइथें बैंकयात धाःसा समस्या जुइ फइगु खँ धाःगु दु । चुक्ता पुँजी वृद्धि यायेगु धकाः राष्ट्र बैंकं नं तयारी धाःसा यानाच्वंगु खँ धाःगु दु ।

थ्व स्वयां स्वदँ न्ह्यः नं राष्ट्र बैंकं चुक्ता पुँजी वृद्धि योजना वंगु आर्थिक दँय् जक क्वचाःगु खः । तर अझ नं छुं बैंकतय्सं आः तकं नं थःपिंसं घोषणा याःगु चुक्ता पुँजी थ्यंके मफयाच्वंगुलिं वंगु दँया नाफा व बोनस शेयर बियाः चुक्ता पुँजी अप्वयेकेत स्वयाच्वंगु दु ।