‘बाहिरी चक्रपथ दयेके फइ मखुत’
येँ – बाहिरी चक्रपथ दयेके मफइगु खँ शहरी विकास मन्त्री इस्तियाज राईं धयादीगु दु । आइतवाः संघीय संसदया विकास तथा प्रविधि समितिया बैठकय् न्ववासें वय्कलं उगु खँ धयादीगु खः । वय्कलं थः मन्त्री जुइ स्वयां न्ह्यः मन्त्रिपरिषदं नीतिगत निर्णय याःगु खँ कनादिसें उगु निर्णयसं जग्गा प्राप्ति ऐनया बारे छुं हे च्वयामतःगुलिं आः बाहिरी चक्रपथ दयेकेत समस्या जुइ फइगु खँ नं कनादिल ।
वय्कलं ६ किलोमिटर जग्गाया अधिग्रहणया निर्णय जूसां ७२ किलोमिटर निर्णय मयाःगुलिं समस्या वःगु खँ नं कनादिल । सरकारं ६ किलोमिटर जक छाय् रोक्का यात धासें थुकिया कारणं हे आः आयोजना दयेकेत थाकुइगु दावी नं वय्कलं यानादिल । वय्कलं थम्हं आयोजनाया बारे अध्ययन यायेगु झ्वलय् झिंनिदँ तक अध्ययन यायेगु व १२२ दँ लिपा जक आयोजना दयेकेगु ज्या क्वचाइ कथं तयार यानातःगु धासें थुकिं देय्यात फाइदा स्वयां अप्वः वेफाइदा जुइगु खँ नं कनादिल ।
न्यादँ न्ह्यः ७५ अर्ब तका जक राज्यं व्यहोरे याःसा गाःगु खःसां आः मेगु न्यादँ लिपा २ खर्ब २५ अर्ब तका खर्च जुइगु जुयाच्वंगु दु । आयोजनाय् स्वंगू आना स्वयां म्हो जग्गाय् छेँ दने मदइगु प्रावधान दुगु खःसां ६ किलोमिटर दुने स्वद्वः स्वयां अप्वः जग्गा स्वंगू आना स्वयां म्हो कित्ताकाट यानातःगु दु ।
वय्कलं आः आयोजना दयेकेगु खःसा अनया अलाइन्टमेन्ट हे हीकेमाःगु खँ कँसें अलाइन्टमेन्ट महीकेगु खःसा आयोजनाया ज्या न्ह्याःवने मफइगु खँ नं कनादिल ।
वय्कलं आःया अवस्थाय् आयोजना दयेके मफइगु अवस्था वःगु खँ नं कनादिल । आः बाहिरी चक्रपथ विदेशी ग्वाहालि मकासें दयेके मफइगु दावी नं वय्कलं यानादिल ।
LEAVE YOUR COMMENTS