थुगुसी छाय् मवयाच्वन चिकुलां वयेमाःगु वा ?

येँ (नेपालभाषा टाइम्स)-खास यानाः येँय् जनबहाःद्यःया न्हवं जुइगु इलय् लाक्क छुं भचा जूसां वा वइगु चलन दु । बुढापाकातय्सं थुकियात जनबहाद्यःया न्हवंलिसे हे स्वानाः स्वयेगु याइ । तर थुगुसी धाःसा जनबहाद्यःया न्हवं सिधःसां वा धाःसा मवल ।

वरिष्ठ मौसमविद् मणिरत्न शाक्यया कथं जलवायु गडबडीया कारणं यानाः थुगुसी चिकुलां वयेमाःगु थ्व वा मवःगु खनेदु । वय्कःया कथं पश्चिमी वायुया प्रभाव कमजोर जूगु कारणं थुगुसी वा मवःगु खः । थ्व वा अझ नं वइगु सम्भावना म्हो जक दुगु खँ वय्कलं कनादीगु दु । थ्वहे वइगु माघया निगूगु वा लिपा जक स्वनिगलय् वा वइगु सम्भावना खनेदु ।

जलवायु परिवर्तनया कारणं ब्वलंगु क्वाःगु फसं यानाः ख्वाउँगु फय् नेपाःपाखे वये मफुगुलिं नं वा वये मफयाच्वंगु खः । पश्चिमी वायु जलवायु परिवर्तनया कारणं आः दक्षिणपाखे वनाच्वंगुलिं यानाः स्वनिगलय् वा वइगु म्हो जूगु खः ।

वंगु ३० दँया तथ्यांक अध्ययन यायेगु खःसा वंगु नीदँ न्ह्यवंनिसें नेपालय् चिकुलां वा वयेगु क्रम म्हो जुया वनाच्वंगु दु । नेपालय् मंसिर १५ गतेनिसें फागुन १५ गते तक चिकुलाया वा वयेमाःगु खः । तर थ्व नीदँ दुने मंसिरं वा वइगु लिबानाच्वंगु दु । वंगु २० दँया अध्ययनया झ्वलय् चिकुलां वा वइगु ई दँय्दसं हे लिबाना वनाच्वंगु खः ।

थुगुसी नेपालय् ‘लानिनो’ नांगु प्राकृतिक लिच्वःया कारणं यानाः नं वा वये मफयाच्वंगु खः । वंगु स्वदँ न्ह्यवंनिसे लानिनोया प्रभाव लानाच्वंगु दु । थुगुसी लानिनो क्वचायाः मेगु दँय् धाःसा चिकुलां नं वा वइगु सम्भावना दुगु खँ कँसें तर जलवायु परिवर्तनया कारणं न्हापा थें इलय् वा वइ कि मवइगु धकाः अनुमान धाःसा याये मफइगु खँ नं वय्कलं कनादिल ।

नेपालय् म्हो जक वा वःगु कारणं कृषि प्रणालीइ नं लिच्वः लाकीगु सम्भावना दु । चिकुलां वा वइगु इलय् यायेमाःगु कृषिखेतीयात थुकिं लिच्वः लाकीगु खनेदु ।

सम्बन्धित बुखँ

LEAVE YOUR COMMENTS