पःकाय् दुगु थीथी गुण
पःका छताजि गुणकारी मसला खः । पःका थ्यंमथ्यं दक्वं हे कथंया अचारय् मसालया रुपय् छ्यलेगु याः । थुकी वासःया गुण नं यक्व हे दु । थुकियात छ्यलाः झीसं यक्व हे ल्वय् लंकेफु ।
थ्व बाहेक मेमेगु नं यक्व हे फाइदा थुकिं याः–
# पःकाया सेवनं नयेगु रुचि अप्वयेकी । थुकिं पाचन शक्ति बल्लाकी । पाचन अग्नि तेज जुलकि स्वाभाविक खः झीसं प्वाः जायेक नःसां जी ।
# पःकाया सेवनं प्वाथय् बुयावइगु ग्यासं नं मुक्ति दइ ।
# पःकाया लखं झीगु प्वाःयात यक्व हे फाइदा याइ । गुम्हेसित सासःया ल्वय् दु, दमं दुख बियाच्वंगु दु, भतिचा न्यासि वनकि हे स्येंस्यें वइगु जुयाच्वंगु दु, वयात पःकाया च्या त्वंकादिसँ ।
# अपच जुयाच्वंगु दु, हैजा जुयाच्वंगु अथवा छ्यंगूया ल्वय्, थ्व दक्वंयात हे पःकां फाइदा याः । महिनावारी अनियमित जुल अथवा तिल्वय् जुल धाःसां नं पःकां उपचार यायेगु सम्भव जू ।
# तिल्वय् वयाः बेहोस जुयाच्वंम्ह ल्वगियात नचुक निनातःगु पःका सफागु कापः छकुतिइ प्वःचिनाः नतुंकादिसँ, याकनं होसय् वइ ।
# सेखं चाल धाःसा पःकाः भचा निनाः कस्तिइ ल्वाकछ्यानादिसँ । थ्व पःका ल्वाकज्याःगु कस्ति सेखं चाःम्ह ल्वगिं नतुनेगु व छगू चम्चा नयेगु नं यायेमाः । ४÷४ घन्टाय् थुलि हे मात्राय् नतुनेगु व नयेगु यानाच्वनेमाः । सेखं चाइमखु ।
# नुगः खुलुखुलु मिनाः अय् याये थय् याये मदयाच्वन व म्ह नं खानाच्वन धाःसा ल्हातय् व तुतिइ पःकाया पेस्टं बुलादिसँ, आराम जुइ ।
# नसा पचय् मजू, गबलें पाउँक धक्काः वइ, गुबलें वायु थहां वइ । थज्याःगु अवस्थाय् छगू चम्चाया प्यब्वय् छब्व पःकाचुं बागू गिलास लखय् तयाः त्वनादिसँ ।
# पिसाब बांलाक मजुयाच्वन धाःसा पःकाचुंया लेप क्वप्वाथय् तयादिसँ ।
# वा स्यानाच्वंगु दुसा पःका क्वाःलखय् तयाः कुल्ला यानादिसँ ।
# प्वाः तसकं स्यात धाःसा पःकाया लेप तयाबिल धाःसा फाइदा जुइ । जब छुं चीज पचय् मजू, अले तसकं अपच जुल धाःसा बागू चम्चा पःकाचुं लखय् संकाः त्वनाबिल धाःसा फाइदा जुइ ।
# हैजाया ल्वगियात बान्ता नं झारा नं जुयाः तसकं सास्ति जुयाच्वंगु दु, अले छेँय् काचाक्क नकेगु छुं वासः नं मदयाच्वन धाःसा प्वाथय् पःकाचुंया लेप तयेकादिसँ, फाइदा खनेदयावइ ।
#अपच अथवा मेगु छुं कारणं हिकु वयाच्वन धाःसा लःलिसें चि छप्तिचा व पःकाचुं छप्तिचा बिल धाःसा लाभ जुइ ।
# मिसातय् महिनावारी जुइबलय् अप्वः कष्ट जुल अथवा थीमजिउ बांलाक खोले मजुयाच्वन धयागु खःसा इमि जा नइबलय् व स्वयां न्ह्यः छुचुं मरि छकूचाय् पःकाचुं इलाः नकाबीमाः, फाइदा जुइ ।
# सेखं चाइबलय् पःकायात कस्तिइ ल्वाकछ्यानाः फ्ययेगु अथवा नतुनेगु यात धाःसा सेखं चाःगु लनी । थुकिं कफ ब्वला वयेकेत नं ग्वाहालि याइ । प्वाथय् खै कुहांवन धाःसा क्वाःलखय् पःकाः तयाः त्वंकाबिल कि खै अःपुक हे पिहां वइ ।
# सँ हाइगु जुयाच्वन, व तुँचा नं दायाच्वंगु दुसा थ्व मदयेकेत पःका चछि लखय् फ्वयातयादिसँ, अले सुथय् थ्व लखं छ्यं चायादिसँ । पःका निनाः पःकाया थुगु पेस्टयात छिं हेयर प्याक थें तुं सँय् पायेफु । थुकिं नां फाइदा याइ ।
सावधान
पःकाया स्वभाव गरम जुइ । थ्व कारणं रक्तपित्त, रक्तवात, हि खनेदुगु अलःकै, म्ह हिइसे च्वनीगु, इकुइगु, ब्लडप्रेसर थहां वनीगु आदि जुल धाःसा पःका नयेगु बन्द यायेमाः ।
LEAVE YOUR COMMENTS