लौका व लौकाया जूसया फाइदा
लौका काचाक स्वयेबलय् सिसि थें च्वनी । अथे जुयाः न्हापायापिं मनूतय्सं थुकियात गंके धुंकाः दुने फ्वाकाः यानाः थुकिया सिसि थें च्वंगु थलय् लः, अय्लाः आदि थनातइगु खः । सायद अथे जुयाः हे अंग्रेजी भासं लौकायात बोटलगार्ड (द्ययततभि न्यगचम) धाःगु जुइमाः ।
लौका छताजि तरकारि खः, तर थ्व तरकारि जक मखु शरीरयात ल्वय् रुपिं जंजालं मुक्त याइगु वासः नं खः । खला लौका तरकारि अप्वःसिनं नये मययेकू, छाय्कि इमित थुकिया सवाः यः मजू । तर लौकां झीत यक्व हे फाइदा याः, अथे जूगुलिं मसाःसां थ्व नयेगु यायेमाः । लौकाया रस ज्वर, मुसु, प्वाःया ल्वय्, नुगःया व मचाछेँया थीथी ल्वय्यात वासः खः ।
प्रति १०० ग्राम लौकाय् ९६.१ प्रतिशत लः, कार्बोहाइड्रेट २.५, प्रोटिन ०.२, चिल्लो ०.१, फाइबर ०.६ प्रतिशत दइ । अथे हे प्रति १०० ग्राम लौकाय् सोडियम १.८, म्याग्नेसियम ५.०, पोटाशियम ८७.०, क्याल्सियम २०.२, सिजः ०.३, न ०.६, फस्फोरस १०, गन्धक १०, भिटामिन बी १०.०३, भिटामिन सी ६.० मि.ग्रा.या मात्राय् दइ । १०० ग्राम लौकां झीत १२ क्यालोरी ऊर्जा चूलाइ ।
लौकाया रस दयेकेगु विधि
लौका बांलाक सिलादिसँ, अले ख्वलालिसें तुं ल्वहंमाय् तयाः छ्यानादिसँ । उकी च्याहः तुलसी, खुहः नवःघाँय् नं तयाः मिक्सिइ तयादिसँ । निने धुंगु लौका छक्वः मलमल कापतय् प्वःचिनाः तिस्सिना कयादिसँ । थुकथं पिहां वःगु रसय् प्यंगः मलय् निनाः तयादिसँ । छगू ग्राम सिंचिचुं नं तयादिसँ । लौकाया रसया मात्रा १५० मि.ली. दयेमाः ।
थुकी १५० मि.ली. लः ल्वाकछ्यानाः ३०० मि.ली. दयेकादिसँ । लुमंकादिसँ, लौकाया रस न्ह्याबलें ताजा रस दयेकाः हे त्वनेमाः । लौकाया सवाः खाइसे च्वंसा गबलें नं त्वनादीमते । न्हापालाक छप्तिचा कयाः त्वनादिसँ, खायूसा वांछ्वयादिसँ ।जा नये स्वयां ४–५ मिनेट न्ह्यः अथवा जा नयाः घौछि लिपा न्हिं स्वक्वः सुथय्, न्हिनय् व बहनी द्यने त्ययेकाः त्वनादिसँ ।
लौकां ठण्डी याइ । अथे जुयाः सेखं चायाच्वंबलय् त्वनादीमते । चिकुलां नं त्वनादीमते । त्वने हे माःसा सुंपालु व मलय् तयाः त्वनादिसँ । सुयातं लौकाया रसं छुं कथं हानि याः धयागु खःसा वं अंगूर वा अनारया रस ल्वाकछ्यानाः त्वनेफइ ।
लौकाया रसं याइगु फाइदा
म्हय् लः मगाःसा ः बान्ता, झारा व तसकं ज्वर वःगु आदि कारणं म्हय् लः मगात धाःसा लौकाया रस व नैंक्याःलः उलि उलि हे ल्वाकछ्यानाः प्रत्येक २० मिनेटय् बागू बागू कप त्वनेगु यानाच्वन धाःसा लः मगाइगु जुइमखु ।
प्वाःया ल्वय् ः छगू कप लौकाया रस सुथय् खालि प्वाथय् न्हिं न्हिं त्वनेगु यानाच्वन धाःसा प्वाःया दक्वं हे सामान्य ल्वय् व कब्जियत लनावनी ।ताःई तक थुकथं हे लौकाया रस त्वनाच्वन धाःसा प्वाः थिक जुयाच्वनी ।
पालितः हियूसा ः लौका तानाः थुकिया पेस्ट दयेकाः बुलाबिल धाःसा पालितः हियूगु लनावनी । लौकाया रस पानाबिउसां जिउ ।
छ्वाल्लुक झारा जूसा ः लौका नचुक छ्यानाः लः भचा तयाः दायेकादिसँ । अनंलि धौ बांलाक संकाः उकी दायेकागु लौकायात भतिचा तिसिनाः ल्वाकछयानादिसँ । अनंलि उकी सिंचि, सियातःगु जी, मलय्चुं ल्वाकछ्यानाः न्हिं स्वक्वः भपादिसँ ।
मानसिक तनाव ः बागू कप लौकाया रसय् निगू चम्चा कस्ति ल्वाकछ्यानाः द्यने त्ययेकाः त्वनाबिल धाःसा तनावपाखें मुक्ति दइ । तं नं क्वलाइ ।
कथु स्याःसा ः छगू गिलास लौकाया रसय् निगू चम्चा कस्ति ल्वाकछ्यानाः त्वनानाबिल धाःसा कथु स्याःगु लनावनी ।
चिनिल्वय् ः लौकाया रसय् चि भचा तयाः त्वनादिसँ । सलादया रुपय् कचिगु लौका नं नयेजिउ ।
प्वाथय् दइबलय् ः लौका मचाछेँ सम्बन्धी विकारय् लाभदायक जू । अथे जुयाः गुपिं मिसातय् बारम्बार हि कुहां वइगु वा मचा कुहां वइगु जुयाच्वनीगु खः । इमिसं प्वाथय् दइबलय् छुं न्हि तक लौका तरकारिया रुपय् अथवा रसया रुपय् सेवन याये हे माः । थुकिं मचाछेँ बल्लाकी । प्वाथय् दुम्ह मिसायात तागत बी । लौकाया रस अथवा तरकारि नल धाःसा प्वाथय् च्वंम्ह मचायात नं पोषण दइ । थुकिं यानाः स्वस्थ व पाय्छि तौल दुम्ह मचाया जन्म जुइ ।
वा स्याःसा ः लौका ७५ ग्राम, लाभा २० ग्राम, नितां निनाः १ लिटर लखय् दायेकादिसँ । लः बछि सुपाः वनकि छानय् यानाः कुल्ला यानादिसँ । वा स्याःगु लनावनी ।
गंसि यायेत ः अथे ला लौकां तौल वा दाः कम जुइ धयागु छुं नं वैज्ञानिक दसि मदु, तर अनुभवीतय्गु दावी दु कि लौकाया रसं तसकं ल्ह्वंपिंत गंसि जुइकेत ग्वाहालि याः । थुकिया निंतिं छिं ताजा लौकाया ख्वला तुलादिसँ । अनंलि दुनेया दुयःयात जूसरय् तयाः ति पिकयाः सुथय् खालि प्वाथय् त्वनादिसँ । थुगु रसय् दुगु आइरन, पोटाशियम व मेमेगु खनिज तत्वं शरीरयात फाइदा याइ, अले ल्ह्वंगुयात नं म्हो याइ ।
छ्यं स्याःसा ः लौका निनाः कपालय् लेप तयाबिल धाःसा गर्मीं यानाः छ्यं स्याःगु लनावनी ।
तसकं ज्वर वःसा ः तसकं ज्वर वल धकाः ग्यानादी मते । तसकं ज्वर वइबलय् पालितःलय् लखं छ्यापछ्याप यानाः लौकाया पेस्टं बुलादिसँ । थुकिं ज्वरया गर्मी कुहां वयाः हल्का जुइ । पालितः हियूगु नं क्वलाइ ।
छ्यंगूया ल्वय् ः लौकायागु रसया प्रभाव ठण्डि जुइ । उकिं गुगु ल्वचय् हिइसे च्वनीगु, अप्वः प्याःचाइगु खः उकी लौकाया रस त्वनाबिलकि फाइदा जुइ । छगू कप लौकाया रसय् छगू चम्चा कस्ति ल्वाकछ्यानाः त्वनाबिलकि म्हया गर्मी, एसिडिटी, प्वाः हियूगु, मिखा हियूगु ल्वचय् लाभ जुइ ।
हि वःसा ः शरीरया गुगुं अंगं हि वयाच्वन धाःसा लौकाया ख्वला नचुक निनाः उगु थासय् पानाः पट्टी चिनाबिल धाःसा हि वयेगु दिनावनी ।
च्वया समस्या ः च्व सम्बन्धी थीथी ल्वचय् लौकाया बागू कप रस पिकयाः उकी सिंचि छप्तिचा व कागतिया रस भचा तयाः सुथय् त्वनादिसँ, च्व बांलाक वइ । च्व फायेबलय् हियूसा लौकाया रसय् कागति भचा तिसिनाः त्वनाबिल धाःसा हियूगु लनावनी । लौका मनाः, न्हायाः रस पिकयादिसँ, अले न्हिं प्यक्वः छगू छगू गिलास त्वनादिसँ । थुकिं नं च्व बांलाक वयेकाबी ।
न्हासि वःसा ः न्हासि वयाच्वंगु दुसा लौकाया रसय् कपाय् प्याकाः खःथें मखुथें तिसिनाः कपालय् तयादिसँ । थुकिं न्हासि वःगु दिनावनी । तर ध्यान बियादिसँ, लौकाया रस मिखाय् वंके मजिउ ।
अम्लपित्त ः गलत नयेत्वने, मानसिक तनाव, अप्वः ज्या यानागु आदिं यानाः म्ह त्यानुइ । थुकथं तनावग्रस्त जुयाच्वनकि शरीरय् एसिड अप्वः दयावइ । गुकिं मेमेगु समस्याया लिसें एसिडिटी नं जुयावइ । थुकिया निंतिं छिं मनातःगु लौकाया तरकारि भपीगु यायेमाः ।
हि सफा यायेत ः बागू कप लौकाया रसय् मिश्री ल्वाकछ्यानाः सुथय् व बहनी त्वनाबीगु यात धाःसा हि सफा जुइ । लौका मनाः चि मतसे न्हिं न्हिं नयेगु यानाच्वन धाःसां नं हि सफा जुइ । कै वइमखु ।
छयंगू बांलाकेत ः लौकाया ताजा ख्वला निनाः ख्वालय् पानादिसँ, ख्वाः बांलानावइ । लौकाया ला बुलाबिल धाःसा हाकुगु चातः वनी ।
कै वयाच्वंसा ः लौकाया रस न्हिं स्वक्वः पानादिसँ ।
मिखा स्याःसा ः लौका निनाः पेस्ट दयेकादिसँ, अले मलमल कापतय् तयाः मिखा तिसिनाः पेस्टया प्वाः मिखापुसाय् दिकाः ४० मिनेट द्यनादिसँ । याकनं हे फाइदा जुयावइ ।
मेमेगु ः सुख्खा मुसु, नये मयइगु व तौल थहां मवइगु आदि समस्या जुयाच्वन धाःसा कचिगु लौका भपादिसँ वा लौकाया रस त्वनादिसँ ।
LEAVE YOUR COMMENTS