ने. सं. ११४४ कौलाथ्व चौथी -

चीनं न्हय्गू बन्दरगाह छ्यले बीगु

येँ – नेपाः आः सामान आयात निर्यातया निंतिं भारतया जक भरय् च्वने म्वाःलीगु जूगु दु । चीनं नेपाःयात थःथाय्या न्हय्गू बन्दरगाह छ्यले बीगु सहमति यायेवं नेपाः सामान आयात निर्यातय् भारतया भरय् च्वने म्वाःलीगु जूगु खः ।

चीनं नेपाःयात प्यंंगू सामुद्रिक बन्दरगाह व स्वंगू सुख्खा बन्दरगाह छ्यले बीगु सहमति याःगु खः । निगू देय् दथुया यातायात तथा पारवहन सम्झौताया प्रोटोकलय् चीनं थ्व बन्दरगाह छ्यले बीगु सहमति क्यंगु खः । आः थ्व सहमतियात कयाः याकनं सम्झौता जुइगु खँ धाःगु दु । वाणिज्य सचिव चन्द्रकुमार घिमिरेया कथं आः सहमति जूगु प्रोटोकलय् छगू विशेष समारोहया दथुइ हस्ताक्षर यायेगु तयारी जुयाच्वंगु दु ।
छुं नं छगू उच्चस्तरीय भ्रमणया इलय् थुकी हस्ताक्षर जुइफुगु खँ वय्कलं धयादीगु दु ।

वाणिज्य सचिव घिमिरें थ्व सहमतिं आयात निर्यातय् भारतय् जक निर्भर जुइमाःगु अवस्था त्वाःदःगु खँ धाःगु दु । थुकिं अवश्य नं नेपाःयात फाइदा जुइ धासें वय्कलं आयात निर्यातया निंतिं बन्दरगाह तक थ्यनीगु लँपु गपाय्हाकः जुइ धयागु खँ परीक्षण लिपा जक सीदइ धयादीगु दु । चीनं भारतं स्वयां अप्वः बन्दरगाह छ्यले दइगु सुविधा बिउगु दु धासें वय्कलं थ्व सहमति लिपा नेपाःया पारवहनय् विविधीकरण वःगु खँ नं कनादिल ।

चीनं आः तत्कालया निंतिं तियान्जेन, सेनजेन, लियानयुंगाङ्ग व झाङ्गजियाङ यानाः प्यंगू सामुद्रिक बन्दरगाह व लान्जाओ, ल्हासा व सिगात्से यानाः स्वंगू सुख्खा बन्दरगाह नेपाःयात छ्यले बीकेत्यंगु खः । थ्व बन्दगाहपाखें नेपालं स्वंगूगु मुलुकय् सामान आयात निर्यात याये फइ । सचिव घिमिरेया कथं थ्व बन्दरगाह छ्यलाः नेपालं हंगकंग, जापान, कोरिया, मंगोलिया लिसें चीन लिक्क लाःगु देशं नं सामान आयात यायेत अःपुइ ।

भारतं थौंकन्हय् नेपाःयात कोलकत्ता व विशाखापट्टनम यानाः निगू सामुद्रिक बन्दरगाह छ्यले बियाच्वंगु दु । चिनियाँ बन्दरगाह छ्यलेगु सुरु जुल धाःसा भारतया बन्दरगाहय् परनिर्भर जुइ माली मखु । छुं जुयाः भारतं न्हापा थें नाकाबन्दी हे याना बिल धाःसां नं चिनियाँ बन्दरगाह जुयाः सामान हयेफइ ।

थप प्यंगू अन्तर्राष्ट्रिय नाका
चीनं आः नेपाः दुहां वयेगु निंतिं प्यंगू थप नाकायात नं अन्तर्राष्ट्रिय नाकाया मान्यता बीगु जूगु दु । चीनं थौंकन्हय् तातोपानी व रसुवाया केरुङ्ग नाकायात जक अन्तर्राष्ट्रिय नाकाया मान्यता बिया वयाच्वंगु खःसा आः किमाथाङ्का, नेचुङ, यारी व ओलाङ्चुङगोलायात नं अन्तर्राष्ट्रिय व्यापारिक नाकाया मान्यता बीत्यंगु खः । थ्व मान्यता वयेवं थुपिं नाकापाखें नं व्यापारिक छ्यलाबुलाया निंतिं सामान आयात निर्यात यायेफइ ।

अथे हे नेपालय् दर्ता जूगु ढुवानी सवारी साधन नं अनुमति कयाः सिगात्से तक यंके फइगु सहमति जूगु दु । थुकिं आः सामान आयात निर्यात यायेबलय् थःत पायक जूगु, किफायती लँपु स्वयाः सामान ढुवानी याये फइगु खँ धाःगु दु ।