येँ महानगरया गुक्वःगु अधिवेशन : स्वंगू दीर्घकालीन व न्यागू अल्पकालीन नीति
येँ – येँ महानगरपालिकाया गुक्वःगु नगर अधिवेशन विहीवाःनिसें थनया राष्ट्रिय सभागृहय् शुरु जुल । अधिवेशनया न्हापांगु न्हि येँ महानगरपालिकाया प्रमुख विद्यासुन्दर शाक्यं वइगु आर्थिक दँ २०७८÷०७९या वार्षिक नीति तथा कार्यक्रम न्ह्यब्वयादीगु खः । वय्कलं स्वंगू विषयय् केन्द्रीत दीर्घकालीन व न्यागू विषयया अल्पकालीन नीति न्ह्यब्वयादीगु दु ।
प्रमुख शाक्यं न्ह्यब्वयादीगु नीति तथा कार्यक्रमय् दीर्घकालीन नीतिया रुपय् स्वंगू प्रस्तावयात न्ह्यब्वयादीगु दु । वय्कलं समृद्ध, सुरक्षित व जीवन्त सांस्कृतिक शहरया समृद्धिया निंतिं ‘सम्पदाय् आधारित पर्यटन व नवप्रवतृनय् आधारित उद्यमशीलता’, ‘आवद्धताय् आधारित सहरी विकास’ व ‘तथ्यय् आधारित नीति निर्माण’यात दीर्घकालीन नीतिया रुपय् अधिवेशनय् प्रस्ताव यानादीगु खः ।
महानगर प्रमुख शाक्यं चालु आर्थिक दँय् ज्याया प्रगतिया विषयय् ९५ गू बुँदा नं न्ह्यथनादीगु दुसा वइगु आर्थिक दँया निंतिं नं २२७ गू बुँदाय् यायेगु ज्याझ्वःयात न्यागू क्षेत्र व निगू दर्जन उपक्षेत्रया रुपय् नीतिइ दुथ्याकादीगु दु ।
कोरोनाया महामारीया कारणं जनजीवनय् लानाच्वंगु लिच्वःयात न्यूनीकरण यानाः जनजीवनयात सामान्य रुपय् हयेगु ज्या हाथ्या जाःगु महसुस यासें न्यागू क्षेत्रय् अल्पकालीन योजनायात दुथ्याकूगु दु । थुपिं न्यागू क्षेत्रय् आर्थिक उत्थानशीलता, विद्युतीय प्रविधिया प्रयोगय् व्यापकता, समुदायय् आधारित पूर्वाधार विकास, जनस्वास्थ्य सेवाया प्रभावकारीता व खाद्य हरित सहरया अवधारणा अनुरुपया विकास खः ।
महानगरया नीति तथा कार्यक्रमय् आर्थिक व रोजगारीया क्षेत्रयात न्हापांगु प्राथमिकता बियातःगु दुसा सामाजिक विकास क्षेत्रयात निगूगु प्राथमिकता बियातःगु दु । थुकथं हे भौतिक पूर्वाधार, वातावरण व्यवस्थापन व सुशासन व संस्थागत विकास क्षेत्रयात छसिकथं स्वंगूगु, प्यंगूगु व न्यागूगु प्रमुख क्षेत्रकथं वर्गीकृत यानातःगु दु ।
येँ महानगरं काःगु नीतिमध्ये १०० बेडया ‘काठमाडौं महानगर कोरोना विशेष अस्पताल’ स्थापना यायेगु, विद्युतीय सवारीइ शतप्रतिशत कर छुट बीगु, कोरोनापाखें प्रभावित करदातायात विशेष छु्ट व सहुलियत बीगु, महानगरवासीया निंतिं नागरिक स्वास्थ्य वीमा संचालन यायेगु, छगू वडाय् छगू नमूना विद्यालय संचालन यायेगु, विद्यालय प्रधानाध्यापकयात लय् द्वःछि तक विशेष प्रोत्साहन भत्ता बीगु लगायतया विषय नीतिइ दुथ्याकातःगु दु ।
LEAVE YOUR COMMENTS