आयोग विरुद्ध नाउपा अदालत वनीगु

येँ (नेपालभाषा टाइम्स)÷नागरिक उन्मुक्ति पार्टी निर्वाचन आयोग विरुद्ध अदालत वनीगु जूगु दु । निर्वाचन आयोगं उगु पार्टीया अध्यक्ष पदय् रेशम चौधरीयात नियुक्तियात अस्वीकार यायेवं उगु निर्णयया विरुद्ध नाउपा अदालत वनेत्यंगु खः ।

नाउपाया अध्यक्ष रेशम चौधरीं महाधिवेशनया फैसला निर्वाचन आयोगं यायेगु खःसा सुनां महाधिवेशन याइ धकाः न्ह्यसः थँसें अदालत वनेगु विकल्प मदुगु खँ धयादीगु खः ।

चौधरीं थःत अध्यक्षया रुपय् अद्यावधिक यायेत निर्वाचन आयोगय् निवेदन बिउगु खः । वंगु बिहीवाः निर्वाचन आयोगं चौधरीयात अध्यक्षया मान्यता बीत अस्वीकार याःगु खः ।

नाउपाया विधान कथं अध्यक्ष जुइत दछि स्थायी कमिटीया दुजः वा केन्द्रीय समितिया दुजः जुइमाःगु व्यवस्था दुसा गुगुं नं फौजदारी कसुर मलाःम्ह जुइमाः धइगु व्यवस्था दु । निर्वाचन आयोगं राष्ट्रपतिं बिउगु माफी सजाय नितिं जक जूगु व कसुर अझ नं ल्यंदनि धासें अध्यक्षया मान्यता बीत अस्वीकार याःगु खः ।