चिडियाखानाय् डिजिटल एजुकेशन सेन्टर

यल –  थनया सदर चिडियाखानाय् डिजिटल एजुकेशन सेन्टर स्थापना याःगु दु । वंगु मंगलवाःनिसें बेलायतया संरक्षणकर्मि फिल्ड मार्सल सर जोन च्यापलया सम्मानय् उगु सेन्टर संचालनय् हःगु खः । सदर चिडियाखानाया कार्यक्रम व्यवस्थापक चिरञ्जीवी पोखरेलं बेलायती संरक्षणकर्मि सर च्यापलया सम्मान स्वरुप नेपाल इन्भेष्टमेन्ट बैंकया ग्वाहालिं उगु सेन्टरया स्थापना जूगु जानकारी बियादीगु दु ।

वंगु प्यंगू दशक न्ह्यवंनिसें नेपाःया जैविक विविधता व संरक्षणय् योगदान बिया वयाच्वनादीम्ह च्यापलया सम्मानय् उगु सेन्टरया स्थापना याःगु खः ।वन तथा वातावरणमन्त्री शक्तिबहादुर बस्नेतं सेन्टरया स्थापनां संरक्षणया क्षेत्रय् महत्वपूर्ण ग्वाहालि जुइगु विश्वास प्वंकादीगु दु ।
वि.सं. २०११ सालनिसें सदर चिडियाखाना सर्वसाधारणया निंतिं खुल्ला याःगु खःसा २०५२ सालनिसें थुकिया व्यवस्थापनया जिम्मा राष्ट्रिय प्रकृति संरक्षण कोषयात बिउगु खः ।

तत्कालीन राणा प्रधानमन्त्री जुद्ध शम्शेरं निजी चिडियाखानाया रुपय् स्थापना याःगु खःसा २००७ सालय् प्रजातन्त्र वयेधुंकाः उकिया स्वामित्व नेपाल सरकार अन्तर्गत वःगु खः । थौंकन्हय् चिडियाखानय् वन्यजन्तु संरक्षण व व्यवस्थापन नापं संरक्षण शिक्षा, अध्ययन, अनुसन्धान, मनोरञ्जन, प्रकृतिया संरक्षण बीगु चेतनामूलक ज्यात जुया वयाच्वंगु दु ।

 

सम्बन्धित बुखँ

LEAVE YOUR COMMENTS