मछिन्द्र आः धाथेंया च्याम्पियन

हिमेश

सुना नं च्वाक्क न्यनेफु, गथे जुयाः मछिन्द्र धाथेंया च्याम्पियन ? निद“ न्ह्यः हे मछिन्द्रं दकलय् न्हापांखुसी सहिद स्मारक लिग ए डिभिजन त्याकूगु खः । क्लबया इतिहासय् थ्व हे न्हापांगु लिग उपाधि जुल । आः नकतिनि नं मछिन्द्र हाकनं छक्वः व हे लिग त्याकूगु दु । थ्व निक्वःगुखुसी जुल । विश्व लिग फुटबलय् छगू धापु दु, ‘छुं नं देय्या ए डिभिजन त्याकेगु अपु मजू । सुनां त्याकल धाःसा शंका यानाः न्यनेयः, ‘गनं भाग्यं जक लिग त्याकूगु ला मखु ला ?’

तर गुबलय् व हे क्लबं झ्वःलाक हाकनं लिग त्याकाः क्यनी, उबलय् धाःसा अज्याःपिं आलोचकतय्सं धायेगु याइ, ‘आः धाःसा धाथेंया च्याम्पियन जुल ।’ मछिन्द्रया ख“ नं थ्व हे खः । फुटबल इंग्ल्यान्डं वःगु धाइ । इंग्ल्यान्डया हे भाय् त्यासा कयाः धायेगु खःसा आः मछिन्द्र ‘ट्र्यु च्याम्पियन’ जुल । मछिन्द्र छक्वः मखु, निक्वःया लिग च्याम्पियन जुल । लिग त्याकेगु थःथम्हं थाकुगु जुल, छक्वः त्याकेधुंकाः व उपाधियात रक्षा यायेगु झन् हे तःधंगु उपलब्धी जुल ।

थ्व ल्याखं व नेपाःया घरेलु फुटबलय् छगू शक्ति जुयाः न्ह्यःने वःगु दु । वया न्ह्यःने मेगु पुलांगु शक्तित लिउने लाःवंगु दु । लिपांगु नीद“ न्ह्यःया ख“ ल्हायेगु खःसा नेपाःया लिग फुटबलय् दकलय् तःधंगु शक्ति खः– मनाङ मस्र्याङ्दी । अनलिं थ्री स्टार वल । अले हाकनं वल– पुलिस । थुपिं स्वंगू टिमं ताः ई तक हे नेपाःया घरेलु फुटबलय् पालंपाः छुं कि छुं उपाधी त्याका वयाच्वंगु खः । थुपिं स्वंगू टिमं जक १४ क्वः ‘ए डिभिजन’ लिग त्याके धुंकल ।

आः पाः खः– मछिन्द्रया । छुं ई न्ह्यः जक वनेगु खःसां छगू ई अज्याःगु वःगु खः, गुबलय् मछिन्द्र दुने बहस जूगु खः– छाय् फुटबल म्हिता च्वनेगु ? अझ धाये फुटबल म्हिता छाय् ध्यबा फुकाच्वनेगु ? गुबलय् फुटबलय् छुं नं कथंया सफलता चूलाइ मखु, उबलय् क्लब नं पाय्छि कथं न्ह्याये फइमखु, अले थज्याःगु न्ह्यसः दनेगु सुरु जुइ । छाय् फुटबल म्हितेगु धयागु बहसया दथुइ मछिन्द्र दुने ‘झीसं फुटबल म्हिते माः, उलि जक मखु धिसिलाक्क हे म्हिते माः’ धयागु ख“ जुल । आःया सफलताया आधार थ्व बहसया लिच्वः खः धायेमाः ।

नेपाःया फुटबल न्ह्याकाच्वंपिनि ख“ न्यनेगु खःसा, उकिसनं अखिल नेपाल फुटबल संघ (एन्फा)या खँ न्यनेगु खःसा थांैकन्हय् दकलय् व्यवस्थित खनेदुगु क्लब खः– मछिन्द्र । उकिसनं मछिन्द्र आः एसियाली फुटबल महासंघ (एएफसी) या क्लब लाइसेन्स कयातःगु टिम नं जुल । अथे धयागु फुटबलया व्यावसायिक क्लब । उकिं हे खः– मछिन्द्रं याकनं हे नेपाःया प्रतिनिधित्व यानाः न्हापांखुसी एएफसी कपया छनोट म्हितेत्यंगु दु, । उकिया अर्थ मछिन्द्र एसियालीस्तरया क्लब नं जूगु दु ।

प्रभावशाली यात्रा
निद“ न्ह्यःया ख“ लिसा कयाः ल्हायेगु खःसा उबलय् अथे धयागु २०७६ सालय् मच्छिन्द्र ए डिभिजन त्याकूबलय् लिगया अन्तिम कासाय् आर्मीयात बुकूगु खः । थ्व कासा जुइ न्ह्यः तकया समीकरण खः, मछिन्द्रं लिग त्याकेगु खःसा थ्व कासा त्याके हे माः, बराबरी अथवा हारया स्थितिइ लिग उपाधि आर्मीया ल्हातय् वनी । लसताया ख“ मछिन्द्र थ्व कासाय् त्यात । छगू कथं उबलय् पूवंक लिगय् ‘नेक टु नेक’ धेंधेंबल्लाः जूगु खः, छक्वः छक्वः मछिन्द्र लिग त्याकी थें च्वनीगु, हाकनं मेगु इलय् मछिन्द्रं लिग त्याके फइमखु थें च्वनीगु । थुगुसी थथे छतिं मजू, लिग उपाधी त्याकेगु झ्वलय् मछिन्द्रं न्ह्याकूगु यात्रा तसकं प्रभावशाली । थुकिया दकलय् तःधंगु प्रमाण धयागु हे मच्छिन्द्र म्हितूगु कासा हे खः । पूवंक लिग कासाय् मछिन्द्र छगू नं कासा मबू । अथे धयागु पूवंक लिगय् मछिन्द्र अपराजित जुल । मुक्कं १३ गू कासाय् मछिन्द्रं ११ गू कासा त्याकल, अले निगू कासा बराबरी म्हितल । आः पूवंक लिगय् छगू नं कासा मबुइगु धयागु नं ला गज्जब खः नि, मखुला ?

गज्जबया खँ थनं तुं क्वचाइ मखु । थुपिं १३ गू कासाय् मछिन्द्रं झ्वःलाक्क ११ गू कासाय् ला छगू नं गोल मनः । अथे धयागु ११ कासाय् क्लिन सिट । थ्व नेपाःया लिग इतिहासय् कीर्तिमान हे खः । थुकिया निंतिं दकलय् अप्वः श्रेय वनी– गोलरक्षक विशाल श्रेष्ठयात । अले वया न्ह्यःने न्ह्यःने च्वनाः म्हितीपिं डिफेन्डरत, विशेषतः रंजित धिमाल, देवेन्द्र तामाङ, छिरिङ गुरुङ व ओमोराजा नुरेनयात । मछिन्द्रं एनआरटीविरुद्धया न्हापांगु कासाय् गोल नःगु खः, अले अन्तिम कासाय् गोल नल, एपीएफविरुद्ध ।

लिगय् मेगु छगू नं धापू दु, ‘कासा त्याइगु फरवार्डया ग्वाहालिं खः, लिग त्याइगु धयागु डिफेन्डरया ग्वाहालिं ।’ अथे धायेवं तुं मछिन्द्रया आक्रमण कमजोर धयागु धाःसा मखु । मछिन्द्रं पूरा लिगया झ्वलय् निर्णायक इलय् निर्णायक गोल याःगु दु । दकलय् न्हापां ला मछिन्द्र लिगय् दकलय् अप्वः गोल याःगु टिम जुल– अथे धयागु २० गोल । थुपिंमध्ये बछि धयाथें गोल कासाया निर्णायक जुल, अथे धयागु व हे गोलं मछिन्द्र त्यात ।

थुकिया दकलय् बांलाःगु उदाहरण ला मनाङविरुद्ध त्याकूगु कासा हे जुल । लिगया खुगूगु चरणय् मछिन्द्र व मनाङ दथुइ कासा जूगु खः, अले सकसियां अनुमान खः, थ्व हे छगू कासां लिग उपाधिया निर्णय जुइ । धाथें अथे हे जुल । छगू इलय् कासा बराबरीइ हे क्वचाइगु खने दयेधुंकूगु खः, तर कासाया निगूगु हाफया इन्जुरी इलय् सुनिल बलं फ्रि किकपाखें सुन्दर गोल यात । थ्व हे गोलं मछिन्द्रं कासा त्याकूगु ला जुल, लिसें लिगया निर्णय नं थ्व हे गोलं जुल धाःसां छुं मपाः ।

उकिं हे सुनिल पूरा लिगया दकलय् उत्कृष्ट कासामि नं जुल । अले विशाल, उत्कृष्ट गोलरक्षक । उलिजक मखु कप्तान सुजल श्रेष्ठया भूमिकायात नं त्वःफिके मजिउ । सुजलं टिमया निंतिं माःकथं माःबलय् पाय्छि भूमिका म्हिताबिल, अथे धयागु गुबलें व फरवार्ड जुयाः म्हितल, गुबलें मिडफिल्डर, अले गुबलें डिफेन्डर तकं । नापनापं मछिन्द्रया थ्व सफलताया छगू कारण विदेशी कासामि आन्द्रेस निआया उत्कृष्ट प्रदर्शन नं खः । मिडफिल्डय् व हे खः– मछिन्द्रया कासाया निर्माता ।

मू ख“ छु धाःसा मछिन्द्रं लिग अःपुक हे त्याका क्यन । लिगया अन्त्यय् मछिन्द्रया नामय् दुगु ल्याः खः– ३५ । आर्मी हाकनं छक्वः निगूगु थासय् लात, तर वयागु ल्हातय् धाःसा २३ ल्याः जक द । अथे धयाःगु निगू टिम दथुया अन्तर हे १२ ल्याः जुल । लिगय् थुलि अन्तर जुइगु धया यक्व हे खः । थ्व हे अन्तरया कारणं लिगया लिपांगु निगू चरणया कासा न्ह्यः हे मछिन्द्रं लिग त्याकीगु निश्चित जूगु । थुकिया अर्थ छु नं खः धाःसा मछिन्द्रयात प्रतिद्वन्द्वी टिमतय्सं छुं कथंया चुनौती हे बीमफु ।
ह्याट्रिक जुइला ?
निद“ न्ह्यःया लिगय् मछिन्द्रं मनाङया बच्छि कासामि, अले थ्री स्टारया छुं भचा कासामि तयाः स्टार टिम दयेकूगु खः । फुटबलया थ्व नं नियम खः– स्टार कासामिं जाःगु टिम दयेकां जक च्याम्पियन जुइफइमखु । ध्यबां लिग उपाधि न्याना कायेफइमखु नं धाइ । लिग त्याकेत ला स्टार कासामि माल हे, तर थुपिं कासामितय्त उतिकं बांलाक व्यवस्थापन नं यायेमाः । मछिन्द्र थथे नं याःगु दु । थुकीया श्रेय धाःसा निम्हेसितं वनेमाः । छम्ह ला जुल प्रशिक्षक प्रवेश कुटवाल । अले मेम्ह जुल– व्यवस्थापक अनिल श्रेष्ठ ।

अनिल अज्याःम्ह मनू खः, गुम्हेसिनं मछिन्द्रया फुटबल टिमयात थन तक थ्यंकेत दकलय् तःधंगु भूमिका म्हितल । वयागु हे कुतलं खः फुटबल हे म्हिते त्वःतेत्यंगु क्लबयात अन्ततः लिग च्याम्पियन दयेकूगु । व नं छक्व मखु, निक्वः । उकिसनं झ्वलाक ।
थन थाय् आः मेगु न्ह्यसः वयाच्वंगु दु, ‘छु मछिन्द्रं मेगु पालय् नं लिग त्याके फइला ?’ अथे जुल धाःसा झ्वलाक स्वक्वः लिग त्याकूगु जुइ । अथे धयाःगु च्याम्पियनया ह्याट्रिक ।

सहिद स्मारक लिगया इतिहास ०११ सालपाखें सुरु जुइ । थ्व नेपाःया कासा ख्यलय् दकलय् पुलांगु व आः तकं न्ह्याना वयाच्वंगु छगूयां छगू जक धेंधेंबल्लाः खः । थ्व ल्याखं थुकिया इतिहास नं तसकं ताःहाकः । थुलि ताःहाकःगु इतिहास दुगु लिगय् नं झ्वलाक स्वकः उपाधि त्याकूपिं स्वंगू हे जक टिम दु, आरसीटी, मनाङ व पुलिस । आः मछिन्द्रया न्ह्यःने थज्याःगु उपलब्धी चूलाकेगु अवसर दु । मछिन्द्र थथे यायेफइ ला ? यात धाःसा ला सकसिनं मछिन्द्र धाथेंया च्याम्पियन खः धकाः स्वीकार यायेमाली ।

सम्बन्धित बुखँ

LEAVE YOUR COMMENTS