भारतीयतय्त श्रम स्वीकृतिया लागिं निर्देशन

येँ – सरकारं नेपाःया उद्योग प्रतिष्ठानय् ज्या याइपिं भारतीय नागरिकयात अनिवार्य श्रम स्वीकृति कायेमाःगु व्यवस्था यायेत्यंगु दु ।
श्रम तथा व्यवसायजन्य सुरक्षा विभागं फुक्कं श्रम तथा रोजगार ज्याकूयात पौ च्वयाः प्रतिष्ठानय् ज्या याइपिं भारतीय नागरिकया ल्याः अध्यावधिक यायेत व श्रम स्वीकृत मकाःगु जूसा कायेगु व्यवस्था मिले यायेत निर्देशन बिउगु दु ।

विभागया कारखाना निरीक्षक प्रशान्त शाहपाखें जारी याःगु पतिइ धयातःगु दु, ‘प्रतिष्ठान निरीक्षण यायेबलय् प्रतिष्ठानय् ज्या यानाच्वंपिं भारतीय नागरिकया ल्याः अध्यावधिक यायेगु व सुं नं भारतीय ज्यामिं श्रम स्वीकृति मकासे ज्या यानाच्वंगु दुसा श्रम स्वीकृति कायेकेगु निंतिं प्रतिष्ठानयात जानकारी बीत निर्देशन बियातःगु दु ।

लिसें प्रतिष्ठानया नां, ज्या यानाच्वंपिं गैरनेपाःमि जूसा उमिगु नां, पद सहितया विवरण समेत मासिक रुपं विभागय् छ्वया हयेत नं श्रम कार्यालययात निर्देशन बिउगु दु । नेपालय् तःधंगु ल्याखय् भारतीय नागरिकत श्रम स्वीकृति मयासे ज्या यानाच्वंगु दु । खुला सिमानाया कारणं अःपुक नेपाः वये फइगु जुयाः भारतीय नागरिकया निंतिं नेपाः अःपुगु श्रम गन्तब्य जुयाच्वंगु दु ।

नेपाःया थीथी कलकारखाना, होटल, प्रतिष्ठान, विकासे आयोजनाया ज्याकुथी तःधंगु ल्याखय् भारतीय श्रमिकत ज्या यानाच्वंगु दु । तर उमिगु पाय्छि तथ्यांक धाःसा आः तक पिहां वःगु मदुनि ।

 

 

सम्बन्धित बुखँ

LEAVE YOUR COMMENTS