आइतवाःनिसें प्रदेश समन्वय परिषद्या बैठक,केन्द्र–प्रदेश वाक्युद्धया खतरा

येँ – येँय् आइतवाःनिसें सुरु जुइगु अन्तर प्रदेश समन्वय परिषद्या बैठकय् प्रधानमन्त्री व न्हय्गुलिं प्रदेशया मुख्यमन्त्रीतय् दथुइ वाक्युद्ध जुइगु सम्भावना ब्वलंगु दु ।वंगु भदौ महिनाय् हे थ्व बैठक च्वनेमाःगु खः । उकिया लागिं प्रधान–मन्त्रीं बैठक समेत सःतेधुंकूगु खः ।

तर बैठकया न्ह्यःने तयारी स्वरुप पोखराय् न्हय्गुलिं प्रदेशया मुख्यमन्त्रीतय्गु बिस्कं भेला यानाः ९ बुँदाया छगू प्रस्ताव हे तयार यायेगु ज्या यायेवं थ्व खनाः तम्वःम्ह प्रधानमन्त्री केपी ओलीं अन्तिम इलय् वयाः थः म्हं मफु धासें बैठक हे स्थगित यानादीगु खः । अबले प्रधानमन्त्रीं तमं स्थगित याना बिउगु बैठक हे थ्व आइतवाःनिसें च्वनेत्यंगु खः ।

मुख्यमन्त्रीतय्गु भेलापाखें प्रधान मन्त्री तम्वःगु खःसां आइतवाःनिसें च्वनीगु बैठकय् प्रस्तुत जुइगु एजेण्डा धाःसा वहे मुख्यमन्त्रीतय्गु भेलां तय याःगु ९ बुँदाया जःखः हे चाःहिलीगु खँ धाःगु दु । बैठकय् प्रधानमन्त्रीयात मयःगु मुद्दा हे पिकायेत्यंगु जुयाः अन प्रधान मन्त्री व मुख्यमन्त्रीतय् दथुइ वाक्युद्ध हे जुइफुगु खँ सूत्रं धाःगु दु ।

प्रदेशया मुख्यमन्त्रीतय्सं केन्द्रं थःपिंत माक्व कर्मचारी छ्वया महःगु, सरुवा याना हःपिं कर्मचारीत नं याकनं सरुवा याना बिउगु, प्रदेशयात माःगु कानून केन्द्रं नं मदयेकूगु व थःपिंसं दयेकेत्यंसां पनेगु ज्या याःगु, कर प्रणाली नं प्रदेशतय् लागिं उपयुक्त मजू कथं दयेकूगु, केन्द्रं बी धाःगु बजेट नं निकासा मयाःगु व निकासा जूगु ध्यबा नं खर्च याके मबिउगु थेंज्याःगु द्वपं बियाच्वंगु दु ।

संघीयताया लागिं माःगु बैठक
संघ व प्रदेशतय् दथुइ बांलाःगु स्वापू कायम जुइमा व उमि दथुइ छुं समस्या दुसा याउँक समाधान याये फयेमा धकाः ‘अन्तर प्रदेश समन्वय परिषद्’ या व्यवस्था संविधानय् हे यानातःगु दु । आइतवाः जुइत्यंगु थ्व परिषद्या बैठक न्हापांगु खः । प्रदेश सरकार गठन जुयाः छुं भचा समस्या पिहां वयेवं थ्व बैठक च्वनेमाःगु खःसां बल्ल दछि लिपा थुकिया बैठक जुइत्यंगु दु ।

संघीयता कार्यान्वयनया सवालय् थ्व बैठकयात अतिकं महत्वपूर्ण रुपं कयातःगु दु । संघीयता कार्यान्वयन यायेबलय् थीथी कथंया समस्या पिहां वयेफुगु जूगुलिं उकियात समाधान यायां संघीय व्यवस्थायात क्वातुकेगु लागिं थ्व परिषद्या व्यवस्था याना तःगु खः । थुकिया बैठक नियमित रुपं च्वनेमाःगु खँ विज्ञतय्सं धायेगु याः ।