कालिमाटीया कामदेव खुया यंकल

येँ (नेपालभाषा टाइम्स)-येँ मनपा १३ वडाय् लाःगु कालिमाटी भिममुक्ते–श्वर लागां कलात्मक कामदेवया मूर्ति खुया यंकूगु दु । जीर्ण जुयाच्वंगु उगु देगःया पिनेसं लाछिइ छत्रं कुइका तःगु मुद्राय् थ्व मूर्ति तयातःगु खः । म्हीग चान्हय् अनं थ्व मूर्ति खुया यंकूगु खँ धाःगु दु ।

मूर्ति यंकूगु बारे प्रहरीइ उजुरी तयेधुनागु खँ उगु वडाया वडा अध्यक्ष ध्रुव नारायण मानन्धरं कनादीगु दु । उजुरी लिपा प्रहरी नं सक्रिय जुइधुंकूगु दु ।

स्थानीय विज्ञतय्सं धाःकथं थ्व मूर्ति म्होतिं नं २०० दँ पुलां जुइमाः धइगु अनुमान दु । नेपालय् कामदेवया मूर्ति म्हो जक थासय् दु ।
देशय् सम्पदा संरक्षणयात कयाः तःजिक सचेतना ज्याझ्वःत न्ह्यानाच्वंगु इलय् द्यः खुया यंकूगुलिं सम्पदाप्रेमित नं आक्रोशित जूगु दु ।

मूर्ति खुया यंकूगु सुचं सार्वजनिक जुइवं म्हिगः थनया सम्पदाप्रेमित न्हापा मूर्ति दुगु थासय् वनाः निरीक्षण नं याःगु खः । थज्याःगु फुक्क सम्पदा नेपाःया सम्पत्ति जूगु कारणं थुकिया संरक्षण याना तयेगु ज्याय् राज्यया ध्यान वनेमाःगु खँय् सम्पदाप्रेमितय्सं सः तःगु दु ।