वैदेशिक रोजगार बचतपत्र प्रभावकारी मजू

येँ – विदेशय् रोजगारया निंतिं वनाच्वंपिंसं छ्वयाहइगु रेमिट्यान्सया सदुपयोग जुइमा धकाः सरकारं हःगु वैदेशिक रोजगार बचतपत्र प्रभावकारी जुइमफुगु सीदुगु दु । चालु आर्थिक दँय् २५ करोड बराबरया बचतपत्र जारी याःगु खःस थुकी छगू करोडजक विक्री जूगु खँ राष्ट्र बैंकं धाःगु दु । उच्च ब्याज बीगु धाःसां थ्व योजना खास हे आकर्षण मदुगु धासें अर्थविद्तय्सं थुकी समीक्षा यायेमाःगु खँ धाःगु दु ।साउदी अरेबिया, कतार, ओमान, मलेसिया थेंज्याःगु देशय् ज्या यानाच्वंपिं नेपालीतय्सं थःपिं कमे याःगु ध्यबा बचत यायेमा व बचत जूगु ध्यबा उत्पादनमूलक क्षेत्रय् लगे यायेगु उद्देश्य तयाः राष्ट्र बैंकं २०६७ सालं निसें वैदेशिक रोजगार बचतपत्र सुरु याःगु खः । तर लक्ष्य कथं बचतपत्र विक्री मजूगु खँ राष्ट्र बैंकया कार्यकारी निर्देशक नरबहादुर थापां बिबिसीयात धयादीगु दु ।

वय्कलं धयादीगु दु, ‘छक्वः जिमिसं न्यागू अर्बया बचतपत्र विक्रीया निंतिं तयागु खः, तर लाखतका बराबरया जक विक्री जुल । थ्व धुंकाः छगू अर्बया आह्वान यायेगु सुरु याना, व नं करोडय् जक विक्री जुल । थ्व पालय् २५ करोड तकाया पितबियागु दु । तर करिब छगू करोडया जक माग जूगु दु । विक्रीया ल्याखं उलि प्रभावकारी खनेमदु ।वैदेशिक रोजगारीइ वंपिं व अनं लिहां वःगु स्वला मदुनिपिं नेपाली नागरिकतय्सं थ्व बचत पत्र न्यायेफइगु व्यवस्था यानातःगु दु । उमिसं ५ हजार निसें ५० हजार तक बचतपत्र न्यायेफइगु व्यवस्था यानातःगु दु । बचतपत्र मीमफुगु छगू कारण थुकिया ब्याजदर जूगु खँ नं कार्यकारि निर्देशक थापां धयादीगु दु । ‘थुकी मुक्कं ९ निसें १० प्रतिशत जक ब्याज बीगु व्यवस्था दु । थौंकन्हय् थीथी वित्तीय संस्थां थ्व स्वयां अप्वः ब्याज बीगु यानाच्वंगु दु । उकिं नं थ्व प्रभावकारी जुइमफुगु खः’, वय्कलं बिबिसीयात धयादिल ।

थ्व योजना लागू जूगु ताःई दयेधुंकाः नं प्रभावकारी जुइमफुगु धासें अर्थविद्तय्सं थ्व योजनाय् हे पुनःबिचाः यायेमाः धयहःगु दु । अर्थविद् केशव आचार्यं बिबिसीयात धयादीगु दु, ‘स्रोत मुलुकय् हे वनाः प्रचार याःवनेमाःगु खः । तर अथे जुइफुगु मदु । आह्वान याःगु स्वयां यक्व हे म्हो जक ऋणपत्र विक्री जुयाच्वंग्ु दु । उकिं थुकी पुनर्विचार यायेमाःगु ई वयेधुंकूगु दु ।’
थगुने थ्यंमथ्यं ७ खर्ब तका रेमिट्यान्स नेपाः दुहांवःगु सरकारी तथ्यांक दु ।