‘नासा’ समाचारयात रोजितापाखें खण्डन

येँ (नेपालभाषा टाइम्स)- नासाय् पूर्ण छात्रवृत्ति कयाःब्वनेखंम्ह न्हापांम्ह नेपाःमि धकाः नां पिहां वःम्ह मय्जु रोजिता बुद्धाचार्यं थःगु बारे पिहां वःगु समाचारया खण्डन यानादीगु दु । म्हिगः सामाजिक सञ्जाल फेसबुकपाखें थःगु धापू तसें वय्कलं थः थौंकन्हय् बेलायतया लिभरपुल शहरय् दुगु व नेपालय् थःगु बारे पिहां वःगु समाचार ब्वनाः ‘ट्वाँ जुयाच्वना’ धयादीगु दु ।

वय्कलं थम्हं सन् २०१७ य् न्हापांखुसी अमेरिकाया बाल्टिमोरस्थित स्पेश टेलिस्कोप साइन्स इन्ष्टिच्युटय् स्वलाया समर इन्टर्नशीप यानागु वयां लिपा नेपाःया अमृत साइन्स क्याम्पस व नेदरल्याण्डस्या लाइदेन विश्वविद्यालयपाखें भौतिकशास्त्र व खगोलशास्त्रय् स्नातकोत्तर यानागु खँ धयादीगु दु । वयां बाहेक मेथाय् गनं ब्वनागु मदु धकाः स्पष्ट यासें वय्कलं थःगु बारे गनं भेरिफाई तकं मयासे समाचार पिहां वःगु खनाः थः आश्चर्यचकित जुयागु खँ कनादीगु दु ।

वय्कलं पेशागत रुपं थः नं पत्रकार हे खः धासें थम्हं गनं मधयागु, गनं नं शेयर मयानागु व मच्वयागु खँयात गय् यानाः समाचार दयेकल धकाः नं न्ह्यसः तयादीगु दु । थः थौंकन्हय् खगोल भौतिकशास्त्र सम्बन्धी उच्च अध्ययनया झ्वलय् बेलायत वयाच्वनागु खँ नं स्पष्ट यानादीगु दु ।