सब्स्क्राइबया धेंधेंबल्लाः

थौंकन्हय् युट्युब सब्स्क्राइबया मामिलाय् भारतया छगू म्युजिक कम्पनी व स्वीडेनया छम्ह युट्युबर दथुइ भिडन्त जुयाच्वंगु दु । छुं न्हि न्ह्यव जक स्वीडेनया युट्युबरं सब्स्क्राइबया मामिलाय् भार–तया तःधंगु म्युजिक कम्पनीयात लिउने लाकाबिउगु खः ।थथे सब्स्क्राइबय् भिडन्त यानाच्वंपिं खः भारतया म्युजिक कम्पनी टि सिरिज व स्वीडेनया युट्युबर प्युडाइपाइ ।

प्युडाइपाइ खास नां धाःसा फिलिक्स कियलबर्ग खः । व कमेडी, गेम कमेन्ट्री, म्युजिक व रियाक्सन भिडियोया निंतिं लोकंह्वाःम्ह खः ।
छुं ई न्ह्यव जक युट्युबय् प्युडाइपाइया सब्स्क्राइबर ७ करोड ८० लाख थ्यंगु दु । व इलय् टि सिरिजया सब्स्क्राइबर ७ करोड ७० लाख थ्यंगु खः ।

थुकथं प्युडाइपाइं छुं न्हि न्ह्यव जक युट्युबय् दकलय् अप्वः सब्स्क्राइबर दुगु च्यानल जुयाच्वंगु टिसिरिजयात लिउने लाकाबिउगु खः ।
प्युडाइपाइ व टिसिरिज युट्युबय् हलिउड बलिउडया ततःधंपिं कलाकारपिं स्वयां यक्वं हे न्ह्यःने लाः । सोशलब्लेड वेबसाइटया कथं प्युडाइपाइया च्यानलय् जक थौंकन्हय् न्हिं छगू लाख ४० हजार सब्स्क्राइब जुयाच्वंगु दुसा टि सिरिजय् १ लाख ६० हजार सब्स्क्राइब वयाच्वंगु दु ।

हिन्दी म्येया म्युजिक भिडियोया निंतिं लोकंह्वाःगु टिसिरिजं युट्युबपाखें जक दँय् छगू अर्ब दां कमे यायेगु यानाच्वंगु दु । सब्स्क्राइबया मामिलाय् प्युडाइपाईं लिउने लाकेधुंकाः टिसिरिजया थुवाः भूषण कुमारं थःपिं नम्बरया कासाय् मदु धासें थःपिनिगु प्युडाइपाइलिसे छुं कम्पिटिशन नं मदुगु खँ धाःगु दु ।

मेखे प्युडाइपाइया प्रशंसकतय्त धाःसा गुलिखे तःधंगु वेबसाइट ह्याक यानाः प्युडाइपाइ च्यानल सब्स्क्राइब यायेत म्यासेज छ्वयेगु यानाच्वंगु द्वपं धाःसा लानाच्वंगु दु । वया प्रसशंकतय्सं छक्वः वाल स्ट्रिट जर्नलया वेबसाइट ह्याक यानाः थःपिं युट्युबय् टि सिरिजया नम्बर १ पोजिसन खतम याये चाहे जुया, उकिं प्युडाइपाइ सब्स्क्राइब याः धकाः सन्देश छ्वःगु खँ नं पिहां वयाच्वंगु दु ।

मेखे सब्स्क्राइबया खँय् वयाच्वंगु धेंधेंबल्लाखं थःपिंत फाइदा हे जुयाच्वंगु खँ टिसिरिजया भूषणकुमारं धाःगु दु । थ्व खँ गुलि बय्बय् जुल, उलि ततःधंपिं अन्तर्राष्ट्रिय कलाकारतय्सं थःपिंलिसे ज्या यायेत स्वापू तःवयाच्वंगु खँ धाःगु दु । थौंकन्हय् टि सिरिजं अन्तर्राष्ट्रिय र्याप गायक पिट बुल व पंजाबी गायक गुरु रंधवा दुथ्याःगु छगू म्युजिक भिडियो रिलिज यायेगु तयारीइ दु ।