ने. सं. ११४४ कौलाथ्व तृतीया -

एलियनय् बासस्थान चन्द्रमा

मणिरत्न शाक्य

ब्रम्हाण्डया छगू ग्रह पृथ्वीइ जीवित प्राणी दु धाथें मेमेगु ग्रहलय् नं जीवित प्राणी दु धयागु खँ धार्मिक ग्रन्थय् ब्वने दु । तर थुकियात प्रमाणित यानाः क्यने फयाच्वंगु मदु । अथे नं थौंया वैज्ञानिक युगय् पृथ्वीं पिने मेगु ग्रहय् मनूत वनेगु, अनया वस्तुस्थितिया बारे अध्ययन, अनुसन्धान यायेगु याना वयाच्वंगु दु, गुगु तसकं रहस्यमय जुयाच्वंगु दु । थ्व हे झ्वलय् पृथ्वीया उपग्रह चन्द्रमाय् जीवित प्राणी दु धयागु अपुष्ट समाचार पिदनाच्वंगु दु । चन्द्रमाया मिसन एपोलो ११ या अन्तरिक्ष वैज्ञानिकतय्सं चन्द्रमाय् जीवित प्राणी खंगु दावी याःगु खः ।

पृथ्वीं पिने मेगु ग्रहया जीवित प्राणीतय्त एलियन धकाः धाइ । एलियन थथे हे च्वं धकाः सुनानं यकिन यानाः धाये मफुसां सामान्यतया मनूत थें च्वंगु, तर तीक्ष्ण बुद्धिजीवि, तसकं विकसित प्राणी जुयाच्वंगु वैज्ञानिकतय् अनुमान दु । सन् १९६९ जुलाई २०, आइतवाः कुन्हु संयुक्त राज्य अमेरिकाया स्थानीय ई कथं बहनिसिया १०ः५६ बजे एपोलो ११ या अन्तरिक्ष वैज्ञानिक निल आर्मस्ट्रङं चन्द्रमाय् दकलय् न्हापां मनूया पलाः तयाः कीर्तिमान कायम याःगु खः । अबलय् चन्द्रमाय् निभाः त्वयाच्वंगु खःसा नील आर्मस्ट्रङ अन २ घन्टा १२ मिनेट च्वंगु खः ।

नील आर्मस्ट्रङं चन्द्रमाय् पलाःतःगु १९मिनेट लिपा एपोलो ११ या हे मेम्ह अन्तरिक्ष वैज्ञानिक इडविन बज एल्द्रिनं चन्द्रमाय् पलाः तःगु खः । उमिसं अन उखे थुखे जुयाः फोटो, भिडियो कायेगु ज्या याःगु खःसा चन्द्रमाया धरातलया नमुना संकलन याःगु खः । अथे हे उमिसं अन निगूति भूगर्भ सम्बन्धित परीक्षण नं यानास्वःगु खः । चन्द्रमाय् न्ह्यानाच्वंगु थज्याःगु गतिविधि पृथ्वीइ च्वनाः चन्द्रमाया मिसन कार्यालय नासाय वैज्ञानिकतय्सं अनया अन हे स्वयाच्वंगु खः । अथे हे अमेरिका नापं थीथी मेमेगु देशं नं स्वयाच्वंगु खः । थबलय् चन्द्रमाय् च्वनाच्वंपिं वैज्ञानिकतय्सं नासाया वैज्ञानिक नाप खँल्हाबल्हा यानाच्वंगु खः ।

थज्याःबलय् चन्द्रमाय् च्वंपिं वैज्ञानिकतय्सं मनुखं सुनानं पत्याः याइमखु थेंज्याःगु अभिव्यक्ति बिउगु खः, गुगु न्यनेबलय् मनूत चकित जुइगु स्वाभाविक जू । उमिसं धाःगु खःकि उपिं अन याकःचा मखु । उमित सुनानं अन हे मेगु थासं स्वयाच्वंगु दु । नापं उमिसं अन उडनतस्तरी नं खंगु खँ न्ह्यथंगु खः । अन्तरिक्ष वैज्ञानिकतय्सं पृथ्वीया नासाया वैज्ञानिकतनाप गोप्य च्यानलय् थ्व खँ ल्हाःगु खः, गुकियात सर्वसाधारणं न्यने दयाच्वंगु मदु । तर नासाया वैज्ञानिकतय्सं थ्व खँयात गोप्य यानातःगु खःसा अनौपचारिक रुपं अन्तरिक्ष वैज्ञानिकतय्सं चन्द्रमाय् छु खंगु धयागु यकिन मजूगु व उकिया प्रमाण नं मदुगु जुयाः पत्याःयाये मफइगु खँ धकाः न्ह्यथनाच्वंगु दु । नासाया थ्व धापू तसकं रहस्यमय जूगु धइगु धापू दु ।

थुलि जक मखु, एपोलो ११ धुंकाः एपोलो १७ तकया दुने मेपिं झिम्ह वैज्ञानिकतय्सं चन्द्रमाय् पलाः तयेधुंकूगु दुसा उमिसं नं एलियन व उडनतस्तरी बारे छुं नं खँ पुष्टि यानाच्वंगु मदु । थुकियात नं आःतक गोप्य हे यानातःगु दु । तर छगू खँ नासाया वैज्ञानिकतय्सं थथे गोप्य यानाच्वंसां चन्द्रमाय् पलाः तःपिं अन्तरिक्ष वैज्ञानिकतय्सं इलय्ब्यलय् बिउगु अन्तर्वार्ताय् उमिसं यलियन व उडनतस्तरी खंगु दावी याना वयाच्वंगु दु, गुगु तसकं उत्सुकताया विषय जुयाच्वंगु दु । उडनतस्तरी पृथ्वीलय् नं यक्व हे मनुखं खंगु दावी यानाच्वंगु दु । उडनतस्तरी एलियनतय् यात्राया वाहन धायेगु यानाच्वंगु दु । थज्याःगु वाहन पृथ्वीइ लखंलख मनुखं खंसां थुकियात तिफ्याये मफयाः अज्ञात वस्तुया रुपय् वर्णन यायेगु यानाच्वंगु दु ।

इतिहास दुवाला स्वयेबलय् अज्ञात वस्तु विशेषज्ञतय् धापू कथं पृथ्वीलय् उडनतस्तरी सन १९४५ पाखे दकलय् न्हापां खनेदुगु खः । सन् १९४५ या जुलाइ १६ कुन्हु संयुक्त राज्य अमेरिकां दकलय् न्हापां न्युक्लियर परीक्षण याःगु खः । थ्व परिक्षण थुलि भयानक व शक्तिशाली जुलकि थुकिया मि ज्वाला अन्तरिक्ष तक खनेदुगु दावी वैज्ञानिकतय्सं याःगु खः । थ्वयां लिपा अमेरिकां जापानया नागासाकि व हिरोसिमाय् न्युक्लियर बम प्रहार याःगु खः । थुकिया लिच्वः नं तसकं भयावह जुयाः अन्तरिक्षं तकं खनेदुगु खः । पृथ्वीलय् थज्याःगु ऐतिहासिक घटना लिपा उडनतस्तरी पृथ्वीइ यक्व खनेदुगु धयागु उल्लेख जुयाच्वंगु दु । वैज्ञानिक विश्लेषण कथं पृथ्वीइ खनेदुगु थज्याःगु गतिविधि नाप परिचित जुइत एलियनत पृथ्वीपाखे वयेगु याःगु खः । थ्व हे झ्वलय् सन् १९४७ जुलाइ ८ कुन्हु अमेरिकाया न्यू मेक्सिकोया रसवेलय् छगः उडनतस्तरी दुर्घटना जूगु खः । थ्व घटनायात उडनतस्तरीया दकलय् तःधंगु घटना कथं कायेगु यानाच्वंगु खः, गुकियात अबलय्या अमेरिकाया राष्ट्रपति ह्यारी ट्रुम्यानं तसकं मन बियाः न्यने कने यानाच्वंगु खः । छाय्धाःसा थ्व दुर्घटना जूगु थासय् लुयावःगु वस्तु पृथ्वीइ उपलब्ध जुइमफइगु जुयाच्वन । तर थ्व घटनायात लिपा अमेरिकी सरकारी निकायं मौसम बेलुन दुर्घटना धकाः धयाः त्वपुयाछ्वत ।

थुलि जक मखु, पृथ्वीया थीथी थासय् उडनतस्तरी यक्व मनुखं खनेधुंकूसां थुकियात अमेरिकां गबलें चासो तयाः स्वयाच्वंगु मदु । अथे हे रुसं नं थज्याःगु घटनायात गुपचुप याना छ्वयेगु यानाच्वंगु दु । थुकिं यानाः पक्का नं एलियन व उडनतस्तरीया बारे अमेरिकाव रुसं खँ सुचुकाच्वंगु आशंका जूगु दु ।
थ्व हे झ्वलय् ब्वने दु कथं अमेरिका व रुसं गोप्य रुपं एलियननाप स्वापू तयाः उमिगु प्रविधि ट्रान्सफर यायेगु ज्याय् लगे जुयाच्वंगु दु । एलियननाप थज्याःगु स्वापूया कारणं अमेरिकां चन्द्रमाय् मनू छ्वयेगु अभियान हे दिकूगु धयागु न्यने दु । तर नासाया वैज्ञानिकतय्सं चन्द्रमाय् मनू छ्वयेगु ज्या तसकं खर्चालु जूगु जुयाः दिके माःगु धइगु धापू तया वयाच्वंगु दु । तर अनौपचारिक रुपं चन्द्रमाय् उन्नत सभ्यता दुगु कारणं मनू छ्वयेगु ज्या दिकेमाःगु धायेगु यानाच्वंगु दु ।

चन्द्रमायात छगू इलय् मनुखं द्यःया रुपय् माने यानाच्वंगु खः । तर थौंया वैज्ञानिक युगय् चन्द्रमाय् मनुखं पलाः तयाः अनया वस्तुस्थित बारे अध्ययन अनुसन्धान यायेगु यानाच्वंगु दु । थ्व हे झ्वलय् वैज्ञानिकय्सं चन्द्रमाय् यक्व हे क्रेटर अर्थात बाता थें गाःवंगु थाय्त दुगु खँ न्ह्यथंगु दु । थज्याःगु क्रेटर चन्द्रमाय् थ्यंमथ्यं ३ लाखति दु, गुकी गनं गनं दथुइ ह्वः दु । थज्याःगु ह्वः हे एलियनतय् बासस्थान धायेगु यानाच्वंगु दु । चन्द्रमाय् थज्याःगु ह्वः यक्व दुगु कारणं चन्द्र दुनें दुनें फुस्कुलु धकाः नं धायेगु यानाच्वंगु दु । अन्तरिक्ष वैज्ञानिकतय्सं यानास्वःगु प्रारम्भिक अध्ययनं नं चन्द्रमा दुने दुने फुस्कुलु जुइफइगु यक्व सम्भावना दुगु क्यनाच्वंगु दु । तर थ्व अध्ययनं अनुसन्धानया विषय जुयाच्वंगु खँ न्ह्यथंगु दु ।

चन्द्रमा पृथ्वीया उपग्रह जूगु जुयाः चन्द्रमां पृथ्वीयात चाःहिलाच्वंगु दुसा चन्द्रमा स्वयम थःगु मेरुदण्डय् चाःहिलाच्वंगु दु । चन्द्रमां पृथ्वीयात छचाः चाःहिलेत २९ न्हु १३ घन्टा लगे जू । अथे हे चन्द्रमा थःगु मेरुदण्डय् छचाः तुलेत नं उलि हे ई लगे जू । अर्थात चन्द्रमाया १ न्हु पृथ्वीया २९ न्हु जुयाच्वंगु दु । थ्व हे कारणं चन्द्रमाय् थ्यंमथ्यं १४ न्हि न्हिनय् जुयाच्वंसा १४ न्हि चान्ह जुयाच्वनी । चन्द्रमायात स्वयेबलय् स्थीर थें खनेदयाच्वंगु दुसा चन्द्रमाया छब्व अर्थात छगू पाता जक पृथ्वीं खने दयाच्वंगु दु । पृथ्वीं खनेदुगु, ब्वयात नियर साइड धाइसा पृथ्वीं गबलें स्वये मखनीगु मेगु ब्व अर्थात पातायात फार साइड अर्थात डार्क साइड धकाः धाइ । थ्व डार्क साइड धायेवं थन गबलें हे निभाः मत्वइगु धइगु मखुकि अनया बारे यक्व हे खँ अनभिज्ञ जूगु व पृथ्वीं थ्वथाय् खनेमदुगु जुयाः डार्क साइड धाःगु खः । थ्व डार्क साइड एलियनतय् वासस्थान धाइसा थनया सतहलय् नियर साइडया तुलनाय् प्रचुर मात्राय् लुँ व प्लाटिनम ल्वाकज्यानाच्वंगु दु धाइ ।

पृथ्वीं खनेदुगु ब्व नियर साइडपाखे ज्वालामुखी मुयाः अनया सतहया रसायानय् यक्व हिउपाः वःगु उल्लेख जुयाच्वंगु दु । थ्व हे ज्वालामुखी मुयाः चन्द्रमाया गर्भं पिहां वःगु हाकुगु चि ल्वाकज्याःगु खनिज पदार्थ सतहलय् जम्मा जुयाः चन्द्रमाय् हाकुगु दाग लाःगु खः, गुकिं यानाः पृथ्वीं चन्द्रमाय् स्वयेबलय् हाकुगु दाग खनेदयाच्वंगु दु । थुकियात ‘मारिया’ धाइ । छगू इलय् मारियायात समुद्र धकाः भाःपियाच्वंगु खः। मारियां चन्द्रमाय् खराचित प्रतिबिम्बित यानाच्वंगु धाइ । खराचा गथे सुन्दर, शान्त जुयाच्वंगु दु, चन्द्रमा नं स्वयेबलय् अथेहे सुन्दर शान्त जुयाः मनमोहक जुयाच्वंगु दु । थ्व हे चन्द्रया सूर्यया प्रकाश ज्वाज्वल्यमान जुयाः पृथ्वीयात चान्हय् नं न्हिनय् थें झःझः धायेकाच्वंगु दु ।

चन्द्रमाय् यानास्वःगु अनुसन्धान कथं अन तसकं म्हो जक फय् दु । उकिं चन्द्रमाय् फय् मदु धकाः धायेगु यानाच्वंगु दु । वैज्ञानिकतय् अध्ययन कथं चन्द्रमाया सतहलय् १ घनसेन्टिमिटरय् थ्यंमथ्यं १०० ग्यास मालिक्यूल दु । तर पृथ्वीया समुद्रया सतहलय् उलि हे आयतनय् १०,००० करोड ग्यास मालिक्युल दु । थ्व हे कारणं चन्द्रमाय् फय् मदु धाइ । तर अन महत्वपूर्ण ऊर्जायुक्त हेलियम ग्यास दु धाइ । चन्द्रमाय् गुरुत्वाकर्षणया भार नं पृथ्वीइ स्वयां खुब्वय् छब्व जक दु । थ्वहे कारणं पृथ्वीया समुद्र नाप चन्द्रमाया आकर्षण अप्वयाच्वंगु दु, गुकिं यानाः समुद्रय् छाल वयेगु यानाच्वंगु दु ।
थथे हे चन्द्रमाया अध्ययनं चन्द्रमाया सतहया तापमान न्हिनय् व चान्हय् हे यक्व थहांकुहां जुयाच्वंगु दु । अन न्हिनसिया तापमान थहां वनाः १२७ डिग्री सेल्सियस थ्यनाः तसकं तांन्वइगु जुयाच्वंगु दुसा चान्हय् थ्व तापमान कुहां वनाः माइनस १७३ डिग्री सेल्सियस थ्यनाः तसकं ख्वाउँ जुयाच्वंगु दु । थ्व नं थाय् अनुसारं पानाच्वंगु दु ।

चन्द्रमाया थज्याःगु भौतिक संरचना व वातावरणया कारण अन सुं नं मनूत याउँक म्वाये फइगु अवस्था मदु । तर एलियनत याउँक वास यानाच्वंगु धइगु आशंकां एलियत सभ्यता आश्चर्यं भयबियाच्वंगु स्पष्ट जुयाच्वंगु दु । थ्व हे आश्चर्ययात चिरे यायेत थौंया आधुनिक युगय् विज्ञान व प्रविधिया माध्यमं एलियन बारे व्यापक खोजीनीति जुयाच्वंगु दु । ब्रम्हाण्डया थीथी ग्रहय् एलियन सभ्यताया सम्भावनाया कारणं अमेरिकां Search for extraterrostrial intelligence (SETI)नांया अनुसन्धान केन्द्र हे स्थापना यानातःगु दु । थुकिया मू उद्देश्य धयागु एलियननाप संचार स्थापना यायेगु खः । अथे हे ईब्यः कथं एलियनतनाप स्वापू तयेगु, उपिं नाप म्हसीका कालबिल यायेगु व उपिं नापनापं जुइगु खः, गुकिं पृथ्वीया उन्नत सभ्यता स्थापनाय् बः बीफइ ।

तर नांजाःम्ह अन्तरिक्ष वैज्ञानिक स्टेफन हकिङया पृथ्वी निवासीतय् एलियनतनापया स्वापू खतरनाक सावित जुइगु भविष्यवाणी दु । एलियनत गबलें सौहार्दपूर्ण जूसां उमिगु दुश्मनी मनूतय् जीवन बर्बादया कारण जुइफु । वय्कःया धापू कथं गथे छम्ह मनुखं लखंलख इमूचित क्षणभरं हे न्हुया छ्वयेफु । अथे हे छम्ह एलियनं लखंलखं मनूतय् बस्ति सखाप यानाबीफु । थ्व हे कारणं पृथ्वी निवासीतय् एलियनत नापया स्वापू थुलि अद्भुत जुइ, उलि हे उपिंनापया चाल होशियारीपूर्ण जुइमालीगु खँय् विश्वास यायेफु ।