आः गोरिल्ला नं फोहरया विरोधय्

माकःयात मनूया पूर्खा धायेगु याः । थ्व हे माकःया प्रजाति दुने लाःगु छथ्वः जीव खः गोरिल्ला । अले थुपिं जक मखु सुं नं जनावर सुचुकुचु यानाः च्वनेमाःपिं मखु । झी मध्ये यक्वसिनं थ्व हे विचाः याःगु दयेमाः कि जनावरतय् ल्हाःतुति फोहर जूसां इमित छुं मतलब दइमखु । इमि झी थें सुचुकुचु जुयाःच्वनेमाः धइगु विचाः हे दइमखु । यदि छिं नं थथे हे विचाः यानाच्वनादीगु खःसा गलत खः ।

छाय्कि अमेरिकाया फिलाडेल्फियाय् च्वंगु चिडियाखानाय् तयातःम्ह छम्ह मिजंम्ह गोरिल्ला थ्व इलय् विरोधय् कुहां वयाच्वंगु दु । उम्ह मिजंम्ह गोरिल्ला थःगु ल्हाः फोहर जूगु धासें विरोधय् कुहां वयाच्वंगु खः । थन तक कि वं थःगु ल्हाः थप फोहर जुइके मबियाः निंतिं मनूथें दनाः निपा तुतिं जक न्यासि वनेगु यानाच्वंगु दु । उमेरं १८ दँ दय् धुंकूम्ह लुइस नांया थ्व गोरिल्ला मेमेपिं स्वयां तसकं यचुपिचु जुयाः च्वनेमाःम्ह खः ।

जब वयागु ल्हातय् गोलभेडा, सन्त्रासि लगायतया नसाज्वलं लाइ व मनू थें दनाः न्यासि वनी । थथे छाय्बलय् नयेगु ज्वनातःगु ल्हातं चुइबलय् व फोहर मजुइमा धकाः खः । उलि जक मखु थः च्वनेगु थासय् सुचुपिचु मजुल वा फोहर जुयाच्वन धाःसा व तसकं घच्चाइगु व तं नं पिकायेगु याः । थःगु म्हय् छुं कथंया फोहर जक लाइगु खःला धकाः नं तसकं सतर्क जुयाच्वनी । चिडियाखानाय् गोरिल्लाया सुसाःकुसाः याइम्ह कर्मचारी माइकल स्टर्नया कथं गोरिल्ला धइपिं निपा तुतिं जक चुयाः वनीगु धइगु तसकं असामान्य खँ खः ।