प्रशिक्षक कार्यशाला संचालन

येँ – नेपाल प्रहरीया साइबर सुरक्षा व लागू वासः नियन्त्रण सम्बन्धय् प्रहरी प्रधान ज्याकुथिइ छन्हुया प्रशिक्षक कार्यशाला विहीवाः संचालन जुल । समुदाय–प्रहरी साझेदारी अवाधारणय् प्रहरी विद्यालय सम्पर्क ज्याझ्वः अन्तर्गत जूगु उगु ज्याझ्वः नेपाल प्रहरीया केन्द्रीय प्रवक्तालिसें सूचना अधिकारी प्रहरी वरिष्ठ उपरीक्षक उत्तमराज सुवेदीया संयोजकत्वय् जूगु खः ।

कार्यशालाया संयोजक प्रहरी वरिष्ठ उपरीक्षक सुवेदीं अपराध नियन्त्रण व अनुसन्धान, समाजय् शान्ति सुरक्षा कायम यायेगु नेपाल प्रहरीया उद्देश्य जूगु खँ न्ह्यथँसें समाजया ग्वाहालिं हे प्रहरी थःगु उद्देश्य प्राप्त याये फइ धयादिल । कानूनया कार्यान्वयनपाखें जक समाजय् शान्ति सुव्यवस्था कायम यायेगु ज्या जुइमखु धासें कानुन कार्यान्वयलिसें समुदायया भूमिका नं उत्तिकं महत्वपूर्ण जुइ धयादिल ।

प्रहरी नायव उपरीक्षक किरणजंज कुँवरं ज्याझ्वः सम्बन्धी प्रतिवेदन न्ह्यब्वयादीगु छन्हुया उगु प्रशिक्षक कार्याशालाय् प्रहरी उपरीक्षक, प्रहरी नायब उपरीक्षक, प्रहरी निरीक्षक, प्रहरी नायव निरीक्षक, सहायक निरीक्षक व आसरा सुधार केन्द्रया प्रतिनिधितय्गु नं सहभागिता दुगु खः ।