केरुङया डान्स बारय् नेपाःया मिस्त
येँ – नेपाःया किशोर उमेरयापिं मिस्त भारतया थीथी शहरय् थीथी कथंया यौनजन्य ज्याय् लगे जुइगु क्रम जारी हे दुसा आः वयाः उपिं चीनया नेपाःलिसे स्वाःगु शहरय् नं अज्याःगु हे ज्याय् लगे जुयाच्वंगु लूगु दु ।खास यानाः नेपाः दुहां वयेगु चीनया छगू जक नाका जुयाच्वंगु केरुङय् नेपाःया मिस्त अवैध यौनजन्य ज्याय् संलग्न जुयाच्वंगु सीदुगु खः ।
नेपाः दुहां वनेगु छगू जक नाकाया रुपय् प्रयोग जुयाच्वंगु केरुङय् थौंकन्हय् आपालं डान्स बारत चायेका हयाच्वंगु दुसा अज्याःगु डान्स बारय् ज्या यायेगु लागिं नेपाःया मिस्त यंकेगु ज्या जुयाच्वंगु दु । छगू सामान्य अनुमान कथं केरुङया थीथी डान्स बारय् थौंकन्हय् ५०० स्वयां अप्वः नेपाःमि मिस्त ज्या यानाच्वंगु दु ।
नेपाःया ल्यासे उमेरयापिं मिस्तय्त केरुङ वनेगुपाखें पनेत नाकाय् हे निगरानी तयेगु ज्या याःसां पूवंक सफल धाःसा जुयाच्वंगु मदुनि । शंका जुल धाःसा चीन वनीपिं मिस्तय्त नाकां हे लित छ्वया हयेगु ज्या नं जुयाच्वंगु दु । वंगु खुलाया दुने १०० म्ह स्वयां अप्वः मिस्तय्त नाकां तुं लित छ्वये धुंकूगु खँ धाःगु दु ।
केरुङ वनीपिं नेपाःमि मिस्त २० दँ स्वयां क्वय्यापिं लात धाःसा उमित अभिभावक हे सःताः न्यनेकने यानाच्वंगु दु । केरुङ दुहां वनेत नेपाःमितय्त नं भिसा आवश्यक जूसां केरुङलिसे स्वाःगु नेपाःया जिल्ला रसुवाया स्थानीय जनतायात धाःसा भिसा आवश्यक मजू । सुं नं नेपाःमि रसुवाय् बसोवास यानाच्वंम्ह स्थानीय वासिन्दा खः धकाः प्रमाणित जुइगु छुं भ्वं दत धाःसा उमित याउँक केरुङ वने बी ।
अन वनाः उमिसं सामान न्याये–मी यायेगु जक मखु अन हे च्वनाः ज्या समेत याये फइगु व्यवस्था दु । रसुवाया स्थानीय मनूतय्त दुगु थ्व सुविधा थौंकन्हय् धाःसा पिने जिल्लायापिं नेपाःमितय्सं नं गलत ढंगं कायेगु यानाच्वंगु दु । पिनें जिल्लाया मिस्तय्सं नं थःपिं रसुवायाम्ह हे खः धइगु नकली भ्वं दयेकाः केरुङ वनेगु यानाच्वंगु खँ सीदुगु दु ।
रसुवाया थीथी सरकारी निकायय् छुं भचा ध्यबा नकल धाःसा अज्याःगु नकली भ्वं तुरुन्त दयेका बीगु खँ नं सूत्रं धाःगु दु ।भारतया थीथी शहरय् थें केरुङय् वनाः खुल्ला रुपं छानबिन याये फइगु अवस्था मदुगुलिं अन छु छु थासय् गुलि नेपाःमि मिस्तय्सं ज्या यानाच्व धकाः धाये मफइगु खँ धाःगु दु ।
आः छुं ई लिपा हे चीनं तातोपानी नाका नं चायेकेगु तयारी यानाच्वंगु दु । थ्व नाका चायेकल धाःसा उखे नं नेपाःमि मिस्त वने फइगु सम्भावना दुगुलिं थुकी नेपाः सरकार सतर्क जुइमाःगु खँ धाःगु दु ।
LEAVE YOUR COMMENTS