ने. सं. ११४४ कौलाथ्व पारू - नःलास्वनेगु

उग्रचण्डी माई देगःया जिर्णोद्वार क्वचाल

यल – थनया ताम्रकारतय् कुलदेवता उग्रचण्डी माईया देगः जनस्तरं हे जिर्णोद्वार याःगु दु । २०७२ सालया तःभुखाचं क्षतिग्रस्त जावलाख्यलय् च्वंगु उगु देगः ताम्रकार समुदायपाखें हे जिर्णोद्वार याःगु खः । तःभुखाचं स्वतँ जाःगु देगःया नितँ क्षतिग्रस्त जुइवं उग्रचण्डीयात दुगुद्यःकथं माने याना वयाच्वंपिं ४५० ताम्रकार परिवारंपाखें प्रतिपरिवार निद्वः तका दां आर्थिक ग्वाहालि म्ह्याः जिर्णोद्वार याःगु खः ।

जिर्णोद्वारया निंतिं मुक्कं नीनिगू लख तका खर्च जूगु व उकी मगाःमचाःगु ध्यबा ताम्रकार समाजं व्यहोरे याःगु खः । देगः जिर्णोद्वार क्वचाःगु लसताय् आः नकतिनि छगू क्षमा पुजा नापं सम्मान ज्याझ्वः नं याःगु खः । ज्याझ्वलय् वरिष्ठ संस्कृतिविद्लिसें वाङ्मय शताब्दी पुरुष सत्यमोहन जोशीं भुखाचं क्षतिग्रस्त सम्पदा समुदायस्तरं नं जिर्णोद्वार यायेगु ज्या तसकं च्वछायेबह जूगु धयादिल ।

कलाकारत देय्या रत्न जूसां राज्यपाखें उचित रुपं सम्मान जुइ मफयाच्वंगु खँय् दुःख प्वंकादिसें ताम्रकार वर्ग नं उच्चस्तरया कलाकारय् वर्ग लाः धयादिल । ज्याझ्वलय् भिंतुना न्वचु बियादिसें यल महानगरपालिकाया उपप्रमुख गीता सत्यालं समाजया ग्वाहालि विना स्थानीय निकाय न्ह्याः वने फइमखु धासें यल नगरय् ताम्रकारं समाजं बियाच्वंगु योगदान अतुलनीय जूगु धयादिल ।

समाजया नायः रविन्द्रराज ताम्रकारं थःपिनिगु सम्पदाया संरक्षण व संवद्र्धन झीसं मयायेगु खःसा सुनां याइ धासें सम्पदा पुनःनिर्माणया निंतिं सरकार व स्थानीय निकाय दातातय् ख्वाः जक स्वयाच्वनेगु प्रवृत्ति अन्त्य जुइमाः धयादिल ।

पुरातात्विक महत्वयात ध्यानय् तयाः देगलय् त्वरंलिसें लुँया जलप सिजःया सामग्रीत पुलांगु हे छ्यःगु खःसा जिर्णोद्वारया निंतिं पुरातत्व विभाग व केटीपिभीया रोहित रंजितं प्राविधिक ग्वाहालि यानादीगु खः । ज्याझ्वलय् मूपाहां जोशीं देगः जिर्णोद्वारया ज्याय् निरन्तर रुपं न्ह्यचिलादीपिं समाजया सम्पदा संरक्षण उपसमितिया संयोजक पवनकुमार ताम्रकार व दुगः रुपबहादुर ताम्रकारयात विशेष सम्मानलिसें श्रमदान यानादीपिंत कदरपत्र लःल्हानादीगु खः ।

समाजया पुलांपिं नायः, सल्लाहकार व दुजःपिनिगु उपस्थिति दुगु ज्याझ्वलय् समाजया अध्यक्ष ताम्रकारं समाजपाखें निर्माण यायेत्यंगु सामुदायिक भवनया शिलान्यास नं यानादीगु खः ।