स्थानीय तहय् स्वद्वलं मल्याक कर्मचारी अभाव

येँ – देय्न्यंकंया थीथी स्थानीय तहय् कर्मचारीया अभाव जूगु दु । देशय् थौंकन्हय् ७५३ स्थानीय तह दु । थुपिं दक्वं स्थानीय तहया निंतिं च्वंनिसें क्वथ्यंकया तहय् कर्मचारी अभाव जूगु सी दुगु दु ।देय्या ७५३ स्थानीय तहया निंतिं च्वय्या तह सहसचिव, उपसचिवनिसें शाखा अधिकृत, सुब्बा तह तक यायेबलय् करिब स्वद्वः स्वयां अप्वः कर्मचारीया अभाव जूगु दु ।संघीय मामिला तथा स्थानीय विकास मन्त्रालयया कथं स्थानीय तहया प्रमुख प्रशासकी अधिकृतपाखे १४४ व वडा सचिवपाखे ३,०५८ पद प्वनाच्वंगु दु ।थुपिं थासय् थौंकन्हय् निमित्तं ज्या यानाच्वंगु मन्त्रालयं जानकारी बिउगु दु ।

दक्वं स्थानीय तहय् करिब ६,१०० वडा ज्याकू दु । मन्त्रालयया कथं विराटनगर व वीरगंज महानगरपालिकाय् ला प्रशासकीय अधिकृत हे मदु । थुपिं निगुलिं नगरपालिकाय् सहसचिवया दरबन्दी दुगु खःसां निमित्तया भरय् ज्या जुयाच्वंगु दु । न्हापा कार्यकारी प्रमुख धायेगु याना वयाच्वंगु थासय् आः वयाः प्रमुख प्रशासकीय अधिकृत धायेगु यानाहःगु खः । निर्वाचित जनप्रतिनिधि वये न्ह्यः प्रशासकीय अधिकृत स्थानीय तहया दकलय् प्रमुख व्यक्ति जुयाच्वंगु खः ।विराटनगर व वीरगंज महानगरपालिका जक मखु २७६ नगरपालिका मध्ये नीछगू नगरपालिकाय् नं प्रमुख प्रशासकीय अधिकृत मदु ।

तर झिंस्वंगू उपमहानगरपालिकाय् धाःसा प्रमुख प्रशासकीय अधिकृत थ्यनाच्वंगु दु ।प्रमुख प्रशासकीय अधिकृत मदु थाय् निमित्तया भरय् संचालन जुयाच्वंगु दुसा ख्वीगुंगुलिइ शाखा अधिृकत हे निमित्त प्रशासकीय प्रमुख अधिकृतया रुपय् कार्य संचालन जुया वयाच्वंगु दु ।नगरपालिक जक मखसे गाउँपालिकाया अवस्था नं अथे हे जुयाच्वंगु दु । ४६० गाउँपालिका मध्ये न्यय्निगू गाउँपालिकाय् प्रमुख प्रशासकीय अधिकृत प्वनाच्वंगु दु । नगरपालिकाय् प्रमुख प्रशासकीय अधिकृत उपसचिव जुइगु व्यवस्था यानातःगु दुसा गाउँपालिकाय् धाःसा शाखा अधिकृत दइगु व्यवस्था यानातःगु दु ।