ब्याज थहां वनेवं अर्थतन्त्र प्रभावित

येँ – वाणिज्य बैंकतय्सं ब्याज दर अप्वयेकूगु दु । थ्व स्वयां न्ह्यः बैंकतय्सं १० प्रतिशतं अप्वः ब्याज मबीगु भद्र सहमति याना तःगु खः ।
वंगु मंगलवाः बैंकर्स संघं पुलांगु सहमतियात चीकेगु निर्णय यायेवं बुधवाःनिसें निक्षेपय् ब्याजदर थहां वंगु दु ।

मंगलवाः जनता बैंकं थीथी पत्रिकाय् विज्ञापन पिथनाः १२ प्रतिशत ब्याज बीगु जानकारी याःगु खःसा माछापुच्छ«े बैंकं १२.५ प्रतिशत ब्याज बीगु खँ धाःगु दु । ब्याजदर थहां वंगुलिं सर्वसाधारण निक्षेपकर्तायात फाइदा जूसां त्यासा कयाः उद्योगय् लगानी याइपिं व व्यवसाय यानाच्वंपिंत धाःसा बेफाइदा जुइगु जूगु दु ।

ब्याज अप्वयेवं आः उद्योगया उत्पादन लागत थहां वनाः बजाः भाः थिके जुइगु आशंका याना हःगु दु । मेखे बैंकतय्सं ब्याजदर अप्वयेकेवं बैंकं बीगु ब्याज नं अप्वयाः बैंकयात नं बेफाइदा जुइगु खँ धाःगु दु । न्हापा मुक्कं बचत खाताया ५० प्रतिशत अप्वः बचत खाता दयाच्वंगु खःसा आः बचत खाता म्हो जुयाः ४० प्रतिशत थ्यंगु दुसा मुद्दती खाता आः ५० प्रतिशत थ्यंगु खँ बैंकर्सतय्सं धाःगु दु ।

बैंकतय्सं ब्याज अप्वयेकेवं उद्योग व्यवसायीतय्सं धाःसा सरकारं हस्तक्षेप यानाः जूसां ब्याजदर क्वकायेत माग याःगु दु । अप्वया वनाच्वंगु ब्याजदरं औद्योगिक वातावरण स्यना वनाच्वंगु धासें थुकिया लिच्वः सरकारं कयातःगु ८ प्रतिशत वृद्धिदरया लक्ष्यय् नं लाये फइगु ख्याच्वः उद्योगतय्सं बिउगु दु ।

उद्योगीतय्सं सरकारं औद्योगिक क्षेत्रया प्रवद्र्धन यायेगु नीति कायेमफुगु द्वपं नं बिउगु दु । उद्योगीतय्सं निक्षेपय् ब्याज अप्वयेकूसां त्यासाय् ब्याज अप्वयेके मजिउगु खँ धाःगु दु ।