च्याम्पियन्स लिगय् बार्यन म्युनिख, चेल्सी व युभेन्ट्स त्यात, बार्सा व युनाइटेड बुत

एजेन्सी- च्याम्पियन्स लिगय् बार्यन म्युनिख, चेल्सी व युभेन्ट्सं थःपिनिगु न्हांपागु कासा त्याकूगु दुसा बार्सिलोना व म्यानचेस्टर युनाइटेडं पराजय फयेमाःगु दु । मंगलवाः चान्हय् जूगु कासाय् जर्मन क्लब बार्यन म्यूनिखं स्पेनिस महारथी बार्सिलोनायात बुकूगु खः । अथे हे चेल्सीं जेनिथ सेन्ट पिटर्सवर्गयात व युभेन्ट्सं माल्मोयात बुकल । इंग्लिस क्लब म्यानचेस्टर युनाइटेड धाःसा क्लब योङ ब्वाइजपाखें पराजित जुल । अथे हे लिगया मेगु कासाय् भिल्लारियल व एटलान्टा, बेनिफिका व डिनामो किभ, सेभिल्ला व आर बी साल्बर्ग दथुया कासा बराबरीइ क्वचाल ।

बार्यन म्युनिखं बार्सिलोनायात ३–० गोलं बुकूगु खः । बार्यनया निंतिं रोबर्ट लेवान्डोस्की निगू व थोमस मुलरं छगू गोल याःगु खः । अथे हे इटालियन क्लब युभेन्ट्सं स्विडेनया क्लब माल्मोयात ३–० गोलं बुकल । युभेन्ट्सया निंतिं एलेक्स सान्ड्रों,पाउल डिबला व अल्भारो मोराटाें छगू छगू गोल यात । इंग्लिस क्लब चेल्सीं रसियाया क्लब जेनिथ सेन्ट पिटर्सवर्गयात १–० गोलं बुकल ।

चेल्सीया निंतिं लुकालुं गोल याःगु खः । म्याचेस्टर युनाइटेडयात स्वीस क्लब योङ ब्वाइजं २–१ गोलं बुकल । युनाइटेडया निंतिं १२ दँ लिपा युनाइटेडय् लिहां वःम्ह कासामि क्रिष्टियानो रोनाल्डों गोल याःगु खःसा क्लब योङ ब्वाइजं निकोलस एनगामालेग व जोर्डन सिबात्सेउं छगू छगू गोल यात ।

लिगया मेगु कासाय् भिल्लारियल व एटलान्टां निगू निगू गोलया बराबरी म्हितल । बेनिफिका व डिनामो किभ दथुया कासा गोलरहित बराबरीइ क्वचालसा, सेभिल्ला व आर बी साल्बर्गंं छगू छगू गोलया बराबरी म्हितल ।

नेपालभाषा टाइम्स

च्वमिया मेमेगु

• भ्वँतय् न्हापांखुसी नेपालभाषा साहित्य तःमुँज्या
• न्हूदँया लसताय् येँ–चौतारा मोटरसाइकल र्‍याली
• संस्कृतिविद् गणेशराम लाछिया ७५ क्वःगु बुन्हि हन
• लुँया भावय् न्हूगु कीर्तिमान
• नेपालय् न्ह्यानाच्वंगु जुजुवादी आन्दोलन, भारतीय हिन्दूत्वया लिच्वः