नेता शम्भुरामया १०० दँ बुन्हिया ज्याझ्वः

यल-  नेपाःया कम्युनिष्ट आन्दोलनया अग्रज नेता शम्भुराम श्रेष्ठया १०० दँया बुन्हि व स्मृति दिवस थनया कुपण्डोलय् च्वंगु सातोआकी भवनय् जुल । क. शम्भुराम श्रेष्ठ स्मृति संस्थाया ग्वसालय् उगु ज्याझ्वः जूगु खः ।

ज्याझ्वलय् नेता श्रेष्ठया अतिकं सतीम्ह पासालिसें नेवाः न्ह्यलुवा डा. महेशमान श्रेष्ठं नेपालय् छगू जक जाति व वर्ग मखसे आपालं जातजाति दुगु व इपिं दक्व जातियात समानता बिया यंके फत धाःसा जक समग्र देय्या विकास जुइ, राष्ट्रिय एकता नं कायम जुइ फइ धइगु विचाः तयादीपिं निम्ह नेता मध्ये छम्ह शम्भुराम श्रेष्ठ जूगु खँ न्ह्यथनादिल ।

एमाले अध्यक्षलिसें पुलांम्ह प्रम केपी ओलीं प्यम्ह सहिदया पे्ररणां मचांनिसें हे राजनीतिइ लगे जुयादीम्ह नेता श्रेष्ठ अज्याःगु ग्यानापुगु इलय् नं तानाशाही विरुद्ध सक्रिय व निडर जुयाः न्ह्यचिला च्वंम्ह पे्ररक व्यक्तित्व जूगु विचाः तयादिल ।

पुलांम्ह प्रधानमन्त्री डा. बाबुराम भट्टराईं नेता शम्भुराम श्रेष्ठ २० औं शताब्दीया हे छम्ह सम्मानित, परिचित व आदरणीय व्यक्तित्व जूगु धासें वय्कः कम्युनिष्टतय् जक मखसे समग्र नेपाःया राजनीतिया उच्च सिद्धान्तनिष्ट नेता जूगु धारणा तयादिल ।

नेता श्रेष्ठया आपालं विशेषतामध्ये नेपाः भारतया छगू अंग धइगु खँय् न्ह्याबलें विरोध यानाः राष्ट्रिय स्वाधिनताया खँय् थःगु स्पष्ट विचाः तयादीम्ह व्यक्तित्व नं जूगु वय्कलं धयादिल । प्रचण्ड, गिरिजाप्रसाद व केपी ओली थेंज्याःपिं नेतात भारत परस्त जुयाः पिहां वःसां नेता श्रेष्ठ न्ह्याबलें नं सार्वभौम नेपाःया पक्षय् जक वकालत याना वयाच्वनादीम्ह व्यक्तित्व जूगु नं वय्कलं धयादिल ।

परराष्ट्रविद् हिरण्यलाल श्रेष्ठं नेता शम्भुराम श्रेष्ठ नेपाःया संसदीय इतिहासय् ताःईतक छम्ह नमूना व्यक्तित्वया नेताया रुपय् काये बहजू धयादिल । नेता श्रेष्ठ छम्ह उच्च अध्ययनशील व्यक्तित्व जूगुलिं हे न्हापा रुस, चीन थेंज्याःगु देशय् जृुइगु सम्मेलनय् ब्वति कायेत वय्कःयात हे छ्वःगु खँ कनादिल ।

जनकवि दुर्गालाल श्रेष्ठं थःत नाप लायेत वःगु इलय् नेता श्रेष्ठं छम्ह साहित्यकार जूगु ल्याखं क्रान्तिकारी साहित्य सिर्जना यानादीसा देय्या निंतिं आपालं बांलाइ धकाः सुझाव बियादीगु खँ लुमंकादिसें वय्कःया हे सुझावकथं थम्हं प्रगतिशील व क्रान्तिकारी साहित्यय् मचायेकं ल्हाः न्ह्याः वंगु खँ कनादिल ।

पुलांम्ह प्रधानमन्त्री झलनाथ खनाललिसें कम्युनिष्ट नेता मोहन विक्रम सिंह, सी.पी गजुरेलं नं थःथःगु नुगःखँ तयादीगु ज्याझ्वः संस्थाया नायः गोर्की श्रेष्ठया सभापतित्वय् जूगु खःसा न्वकु केशवकृष्ण श्रेष्ठं लसकुस यानादीगु खः ।

सम्बन्धित बुखँ

LEAVE YOUR COMMENTS