कोशकार मालीयात हेमराज सिरपाः

यल – लिपि विशेषज्ञ नापं संस्कृतिविद् मदुम्ह पं. हेमराज शाक्यया लुमन्तिइ नीस्वनातःगु हेमराज सिरपाः समालोचक नापं नेपालभाषा तःखँग्वः धुकूया कोशकार इन्द्र मालीयात लःल्हात । लोक साहित्य परिषद्या ग्वसालय् शनिवाः जूगु छगू ज्याझ्वःया दथुइ उगु सिरपाः लःल्हाःगु खः । वाङ्मय शताब्दी पुरुष सत्यमोहन जोशीं उगु सिरपाः कोशकार मालीयात लःल्हानादीगु खः ।

पं. हेमराज शाक्यया लुमन्तिइ वय्कःया छेँजःपिंसं भाषा, साहित्य, संस्कृतिया ख्यलय् नापं नेपाल लिपिया प्रचार प्रसार खोज, अनुसन्धान थेंज्याःगु आदि ज्याय् च्वछायेबहगु योगदान बियादीपिं व थ्व सम्बन्धी कृति पिथना वयाच्वंपिं व्यक्ति व संस्थायात लःल्हायेकथं उगु सिरपाः नीस्वनातःगु खः । लोक साहित्य परिषद्पाखें लःल्हायेगु याना वयाच्वंगु सिरपाःया राशि छगू लाख तकाया खः ।

ज्याझ्वलय् नवासें शताब्दी पुरुष जोशीं नेपालभाषाया ख्यलय् नीस्वनातःगु थीथी सिरपाःयात कयाः चर्चा यानादिसें थज्याःगु सिरपालं च्वमिपिं नापं भाषा, कला, साहित्य व संस्कृतिया ख्यलय् सनाच्वंपिंत हौसला बी धयादिल । लिसें च्वमिपिं मदिक्क च्वसा न्ह्याकेत हःपाः बी धासें सकसिनं थथे हे च्वयेगु यानाच्वन धाःसा झीगु भाय् सी धकाः गबलें नं शंका यानाच्वने माली मखु धयादिल ।

सिरपालं सम्मानित जुयादीम्ह कोशकार मालीं थःगु उसाँय्यात तकं चिउताः मतसे गुकथं ज्वःमदुगु कोश दयेकाः थःगु मांभाय् प्रतिया मतिनायात पिब्वयादिल, व धाथें हे च्वछायेबहजू धयादिल । परिषद्या नायः प्रा. प्रेमशान्ति तुलाधरं पुरस्कृत व्यक्तित्व मालीया म्हसीका बियादिसें वय्कः छम्ह भाषाविद, निबन्धकार, समालोचक व कोशकारया रुपय् नं थःत म्हसीकेत सफल जूगु धयादिल ।

सम्बन्धित बुखँ

LEAVE YOUR COMMENTS