आः वइगु निलां मेलम्चीया लः थ्यनी

येँ  – आः वइगु निलाया दुने मेलम्चीया लः येँय् हयां त्वःतेगु प्रतिवद्धता खानेपानी मन्त्रालयं प्वंकूगु दु । मेलम्चीया लः स्वनिगलय् हयेगु खँयात कयाः तःक्वःमछि ई क्वःछिउसां नं लः हयेगु ज्या धाःसा आः तक जुइ फयाच्वंगु मदु । लिपांगु इलय् बिना मगर खानेपानी मन्त्रालयया मन्त्री जुइधुंकाः वंगु मोहनि बलय् स्वनिगलय् लः हयेगु प्रतिवद्धता प्वंकूगु खः ।

प्रतिनिधिसभा, विकास तथा प्रविधि समितिइ म्हिगः च्वंगु बैठकय् मन्त्रालयया सचिव गजेन्द्रकुमार ठाकुरं फुक्कं ज्या निलाया दुने क्वचायेकाः सुन्दरीजलया प्रशोधन केन्द्रय् लः क्वफायेगु प्रतिवद्धता प्वंकादीगु खः ।

मोहनि न्ह्यः हे लः हयेगु तयारी जुयाच्वंगु खःसां प्राविधिक ज्याय् समस्या वःगुलिं इलय् क्वचायेके मफुगु खँ कनादिसें सचिव ठाकुरं आः थ्यंमथ्यं निद्वः मिटर सुरुङ ढलान यायेगु ज्या ल्यं दनिगु व स्वंगः भ्यान्टिलेसनया ज्या शुरु जूगुलिं निलाया दुने क्वचायेकाः लः हयेगु प्रतिवद्धता प्वंकादीगु खः ।

अम्बाथानं सुरुङय् छ्वःगु लः जायेकेत स्वन्हु ई काइगु जानकारी बियादिसें वय्कलं पुलांगु हे संरचनापाखें लः इनेगु खँ नं कनादीगु दु । स्वनिगलय् लः थ्यनेवं १८० हजार धाः हितिइ लः इनेगु कथं तयारी जुयाच्वंगु जानकारी नं वय्कलं बियादिल । थ्वहे झ्वलय् मन्त्रालयं लःया न्युनतम शुल्क थकायेगु बारे गृहकार्य यानाच्वंगु खँ नं सीदुगु दु ।

मन्त्रालयं आः म्होतिं नं लय् स्वसः तका शुल्क कायेगु तयारी यानाच्वंगु दु । मेलम्चीया १७ करोड लिटर लः वयेधुंकाः वयां लिपा निगूगु चरणया आयोजना शुरु यायेगु तयारी जुयाच्वंगु दु । निगूगु चरणय् याङ्ग्री व लार्के खुसिं १७–१७ करोड यानाः ३४ करोड लिटर स्वनिगलय् हयेगु तयारी जुयाच्वंगु दु ।

निगुगू चरणया आयोजना स्वदँया दुने क्वचायेकेगु प्रतिवद्धतां सचिव ठाकुरं प्वंकादीगु दु । याङ्ग्री व लार्के खुसिया लः हयेगु निंतिं ११ किलोमिटर सुरुङ म्हुइमाःगु खँ धाःगु दु ।

सम्बन्धित बुखँ

LEAVE YOUR COMMENTS