जनतां आन्दोलन यायेवं धल्कोय् नं पीच शुरु

येँ – क्षत्रपाटीया स्थानीय जनतां लँ बन्द यानाः आन्दोलन यायेवं स्थानीय जनता व ठेकेदार कम्पनी दथुइ उगु लागाया लँ पीच यायेत सहमति जूगु दु । म्हिगः स्थानीय वासिन्दां क्षत्रपाटी दुवातंनिसे धल्को तकया सतक पीच यायेत दबाब बीगु लागिं बन्द यायेवं ठेकेदार कम्पनी सैलुङ निर्माण कम्पनीं म्हिगःनिसें ज्या न्ह्याकाः झिंन्यान्हुया दुने क्वचायेकेगु सहमति याःगु खः ।

स्थानीय जनतां सतक बन्द यायेवं १७ वडाया वडाध्यक्ष नवीन मानन्धरं स्थानीय जनता व ठेकेदार कम्पनीयात वडाय् हे सःताः सहमति याकादीगु खः । निर्णय कपीइ वडा अध्यक्ष मानन्धर, स्थानीय जनताया प्रतिनिधि, ठेकदार कम्पनीया कार्यकारी प्रमुख व प्रहरी प्रशासनं हस्ताक्षर यानातःगु दु ।

उगु थासय् सतक पीच मजूगुलिं धू ब्वयाः हैरान जुयाच्वंपिं जनतां पीच याकेत आन्दोलन याःगु खः । थ्वहे झ्वलय् यल ७ वडाया लुँहितिंनिसें ग्वार्कोया स्थानीय वासिन्दां नं सतक पीच यायेमाःगु माग यासें म्हिगः सतक बन्द याःगु दु । सतक पीच मजूगुलिं धू ब्वयाः जनताया स्वास्थ्यय् लिच्वः लाःगु धासें स्थानीय जनतां सतक बन्द याःगु खः ।

उकथं हे तोखाय् जुयाच्वंगु निर्माण ज्याया विरोध यासें अन नं स्थानीय जनतां प्रदर्शन याःगु दु । तोखाया सांस्कृतिक लागा दुने लाथेपाथे निर्माण यानाच्वंगु धासें स्थानीय जनतां विरोध याःगु खः । थज्याःगु विरुद्ध अन ‘तोखा सांस्कृतिक संरक्षित लागा दुने मापदण्ड अःखः दयेकाच्वंगु ज्या बन्द या’ धकाः च्वयातःगु ब्यानर ब्वयेगु शुरु याना हःगु दु ।

थ्वहे झ्वलय् असंया कोथुननी बचाउ संघर्ष समितिं म्हिगः छगू अन्तक्र्रिया याःगु दु । ज्याझ्वलय् नेतृ हिसिला यमि, येँ मनपाया मेयर हरिप्रभा खड्गी व २५ वडाया वडाध्यक्ष निलकाजी शाक्यपिंसं ब्वति कयादीगु खः ।